Suroy-suroy
Padayon ang gihimo nakong suroysuroy ug himamat sa mga parokyano sa mga nagkadaiyang dapit sa Madridejos, Alegria.
Gikan sa patag ngadto na sa bukid akong gisuroy ug gisuhid ang mga dapit nga akong duawon inig abot sa panahon.
Nagkadaiya ang dagway nga akong naabtan. Hinuon diha sa kayano ug kalipay ako ilang giabi-abi sa ilang panimalay.
Butang nga nakahatag kanako og kalipay ug kadasig nga maningkamot pa kun unsay mahimo alang sa ilang espirituhanong panginahanglan.
Mao nga alang nako gamit gyud kaayo ang suroy-suroy dili aron maglingaw lingaw lang kondili aron makigsandurot.
Gitawag kini og Dialogue of Life diin ang maong panagtagbo maghatag sa matag tawo og kahigayonan sa pag-ila sa ilang kaugalingon.
Kun ang tawo mailhan mo nan, the more nimo makita ang iyang bili nga tungod niini mas sayon alang kanimo nga siya higugmaon.
Sa laing bahin, ang Dialogue of Life mao usab ang maghatag kanimo og mas dakong kahigayonan sa pagsuhid sa tinud-anay nga panginahanglan.
Usahay man gud molahos lang kita sa paghimo sa giisip natong maayo apan wala diay kini kinahanglana sa mga tawo nga nagpalibot kanimo.
Mao nga imbis malipay ug makontento mamahimo naman nuong salingkapaw lamang ang tanan.
Mao nga padayon ko sa akong pagsuroy-suroy ug nagkadaghan ang akong nakaila ug nahimamat ug nakaila.
Daghan ang mga pagtulon-an nga mabawon ug daghang mga kasinatian nga mahimong magambalay diha sa pagtimbayaay ug pagminahalay.
Sa laktod nahimong mas mabulokon ang tanan kun anaa ang gitawag natong kukabildo sa kinabuhi. Husto si Sir Mario nga sa Bukid nga Mahilom, wala ang kasakit!
- Latest