Pagkamaigmaton

Agosto 11, 2019: Ikanapulog-Siyam

nga Domingo sulod sa tuig

Mga Pagbasa:  Kin. 18;6-9/Sal. 33/

Heb. 11;1-19/Lk. 12;32-48

Ning atong panahon karon dili maayo nga mokumpiyansa labina sa mga higayon nga dunay mga kawat nga mahitabo. Kay kun maghinobra gani ang atong kumpiyansa mamahimo nga kita ang madaut ug mapagan pa hasta ang atong hinagoang mga butang. Mao nga kinahanglan gyud nga magmaigmat kita aron sa ingon pabilin kitang luwas gikan sa bisan usang kadaut.

Apan dunay laing rason nganong kinahanglan kitang magmaigmaton.kini ang naglangkob ning mosunod:

1. Una, wala kita masayud sa takna sa panudya. Ang Dios ra ba mangayo gyud og husay sa bisan unsa nga iyang gihatag kanato. Unsaon na lang kun moabot siya dayon wala kitay mahimo labina kun mosugod ang litaniya sa accounting alang sa matag usa kanato.

2. Ikaduha, mubo ra gyud kaayo ang kinabuhi busa dili maayo nga kini atong usikan. Lisud kaayo kun mapupos kini nga walay bisan usang lama sa pagka makahuloganon.

3. Ikatulo, ang tinuod nga tinun-an tawo nga ligdong ug kasaligan. Ang paghimo og bisan unsa nga maayo nga haum ug sibo sa atong kahimtang o bokasyon dako kaayo og kahimoan aron mamahimong mapuslanon ang matag gutlo.

4. Ikaupat ug katapusan. Padayon sa paghunahuna nga anaa ra gyud ang Dios ug nga kuyog nimo kay ning paagiha maningkamot ka nga mamahimong tarong ang imong pagabuhaton tungod sa imong dakong gugma sa Dios.

Dili kini isyu sa pagkamaigmaton lang, kondili isyu kini kun anaa bay gugma ang imong kaugalingong kasingkasing nga tungod niini maningkamot kang mohimo og bisan unsa nga maayo ngadto sa uban.

Busa aron di kita maulawan buhata ang maayong butang sa kasamtangan ug ayaw na paabota pa ang ugma.