EDITORYAL - Lead by example

Lead by example. Mao kini ang kanunay nga panawagan alang sa mga lider o nagkadaiyang opisyales sa gobiyerno. Apan dili lamang kini ekslusibo lang sa mga opisyales kondili apil niini ang mga ordinaryong kawani sa gobiyerno. Sama nalang sa jaywalking enforcers sa City Traffic Office sa Cebu City diha sa nagkurus nga dalan sa Colon ug Osmeña Blvd. higpit kaayo silang nipatuman sa anti-jaywalking ordinance.

Ini og makabantay silang dunay padung motabok pitohan dayon, ug kadtong mga gahi gyud og ulo nga mopugos og tabok bisan gipitohan sikupon ug pamultahon tungod sa paglapas sa ordinansa.

Maayo kaayong paminawon kay lagi ‘madisiplina’ ang mga pedestrians sa pagsunod sa mga lagda sa trapiko. Apan sa tibuok siyudad sa Sugbo, diha ra sab sa maong eskina higpit nga gipatuman ang anti-jaywalking ordinance. 

Apan makalibog sab kay dunay mga naka-obserbar sa mga traffic enforcers ug anti-jaywalking enforcers diha sa maong dapit nga magtabok-tabok raman sa dalan bisan og dili pa tingtabok sa mga pedestrians.

Nagsalig ba sila nga sila maoy otoridad? Exempted diay sila sa maong ordinansa? Dili ba ngil-ad tan-awon sa mga tawong nagpaabot nga sa stop ug walk diha sa eskina nga ang mga enforcers yano-yano ra man og tabok ug walay mosita?

Si Pres. Rodrigo Duterte sa iyang ikaupat nga State of the Nation Address niadtong adlaw nga Lunes, ang kurapsyon ug ang problema sa illegal nga drugas ug kriminalidad mao ang iyang gitutokan.

Si Duterte mibalik-balik na niining iyang bahad batok sa mga kurakot nga mga opisyales sa gobiyerno. Ang pagbawog sa balaod o ordinansa usa ka matang sa kurapsyon ug pag-abusar sa katungdanan.

Sa iyang pamahayag sa SONA iyang giawhag ang mga kawani sa gobiyerno nga isipon ang ilang kaugalingon nga mga ehemplo sa katawhan. “Lead by example” matud pa niya. Angay tingaling pamalandongan sa tanang mga kawani sa gobiyerno ang maong mga pulong kay pagkakaron nakalimot silang mga alagad sila sa gobiyerno ug dili mga hari ug rayna.