Dakong legasiya ni Pacquiao

Bisan kun matawag na siya og “senior citizen” sa boksing tungod sa iyang edad ug daghang katuigan nga eksperensiya, lisod pa gihapon nga tupngan ang katakos sa Pilipinhong kampiyon nga si Manny Pacquiao.

Kaniadtong Domingo, mipakita na usab sa iyang magic ang senador, ang nag-inusara nga eight-division world champion sa kasaysayan sa boksing.

Kini sa dihang gipildi niya ang mas batan-on nga si Keith Thurman sa ilang championship match didto sa Las Vegas. Sa wala pa ang ilang sangka sa MGM Grand Garden Arena, grabe nga nakapanghambog ang Amerikano nga iyang gayud nga tumbahon si Pacquiao.

Gani mipusta kuno kini nga iya ma-knockout ang Pilipino sa unang tulo ka round.

Apan nabali ang iyang tagna atol na sa kumbati. Si Thurman man hinuon ang mikamang sa unang round pa lamang.

Mayoridad sa mga round wala gayud kaugpo si Thurman.

Gani dunay higayon nga mora kini og naluro gumikan sa mga body shots ni Pacquiao.

Taliwala niining iyang bag-o nga kadaugan, wala pa mihupas ang abilidad ni Pacquiao sulod sa ring. Sa nangagi niyang mga sangka, morag 20 anyos ang atong pambato nga mikulata sa iyang mga kontra nga mas manghud pa kaayo niya.

Hinuon, bisan pa man sa panawagan sa iyang pamilya ug mga sumusunod nga angay na gayud siya nga mopahuway tungod sa iyang edad, morag makapaabot pa kita og sunod nga mga saka ni Pacquiao sa ring. Ug morag puntariya niya ang laing mga tang-an sa welterweight division nga silang Terence Crawford ug Errol Spence kinsa mga wala pay pildi ug nga mas bata pa ni Pacquiao.

Gani daghan ang miingon nga di gayud magsilbi si Pacquiao sa maong duha ka boksidor.

Ambot kun matinuod ba ang iyang away batok kang Spence ug Crawford.

Apan kun dili man, dili kana kakulangon sa legasiya sa Pilipinhong kampiyon. Dako ang kontribusyon ni Pacquiao sa boksing nga siguradong motugpa gayud siya sa Hall of Fame.

Alang kanako, mas maayong moretiro na lamang si Pacquiao.

Wala na siyay angay nga iprobar pa sa boksing. Anaa na niya ang tanan ug nga dili na gayud matandog pa ang iyang legasiya.