Responsibilidad sa DepEd

Naandan na sa kalungsoran nga ang mga dump truck maoy dali nga kasakyan paingon sa mga bukirang barangay.

Ang mga molupyo sa kalungsoran, labi pa kadtong tua nagpuyo sa kabukiran, naanad na lang pud nga sa matag higayon nga manghuwam sila og sakyanan sa gobiyerno, dump truck maoy ihatag kanila.

Ambot tungod ba kaha kay way laing sakyanan nga makasugakod og tungas sa kabukiran o tungod ba kay nakaminus ang mga opisyal sa mga nagpuyo sa bukid.

Niining duha posibling ang naawahing rason maoy nahitabo. Kini tungod kay og silang mga opisyal maoy motungas sa kabukiran duna may disente ug luwas nga kasakyan.

Subo ang nahitabo didto sa Barangay Becerril sa lungsod sa Boljoon niadtong Biyernes sa buntag.  Mga tinun-an gikan sa pampublikong tunghaan ang mopaingon unta sa lungsod alang sa usa ka kalihukan.

Luwan sila sa dump truck nga gipanag-iya sa lungsod dihang nahitabo ang disgrasya. Nalimbuwad ang dump truck og nadat-ugan ang ubang mga pasahero. Siyam ang patay ug 16 ang naangol.  Tinuod nga ang disgrasya dili kapugngan, apan nalikayan unta tingali ang ingon niadto kadaghan nga nakalas kun husto ang sakyanan nga gigamit.

Sayod ang tanan nga ang dump truck dili aron kargahan og tawo. Siyaro naman pud og wala gyuy van o bisan jeep nalang nga magamit?

Dako og responsibilidad ang lokal nga mga opisyal sa lungsod ug sa mga magtutudlo sa nahitabo.

Ilang gisugal ang kinabuhi sa mga tinun-an pinaagi sa pagtugot nga dump truck maoy ilang sakyan paingon sa lungsod.

Ang Department of Education angayang mosiguro nga sa matag higayon nga ilang tugotan ang mga estudyante nga mobiyahe gawas sa tunghaan dunay luwas nga sakyanan nga magamit.

Dili ni unang higayon nga nadisgrasya ang mga dump truck sa gobyerno nga gigamit paghakot og mga pasahero.

Sa nangaging mga higayon duna say mga kinabuhi nga nakalas. Apan hangtud karon wala gyud makakat-on og leksiyon ang atong mga opisyal. Panahon na aron did-an ang paggamit sa mga dump truck aron paghakot og mga pasahero.

Nahinumdom ko nga dunay gipanghatag si Gobernador Gwen Garcia nga mga mini bus niadto alang sa Suroy-Suroy Sugbo. Nganong dili kadtong maong mga bus maoy gamiton sa kalungsoran inay nga mga dump truck.