Interim OSCA Head

Una sa tanan, angay mahibaw-an sa mga senior citizen nga tapus mapupos ang term ni Doming Chaves pagka-OSCA Head sa niaging Enero 17, 2018, wala kitay OSCA Head, kini mga usa ug tunga sa tuig.

Ang pagtudlo og OSCA Head gisitar kini sa RA 9994 kon Expanded Senior Citizens Act of 2010. Gani, diha na kini nga provision sa gi-amendar nga RA 9257 kon Expanded Senior Citizens Act of 2003.

Ang Balaud nagkanayon: “There shall be established in all cities and municipalities an OSCA to be headed by a senior citizen who shall be appointed by the mayor for a term of three years without reappointment but without prejudice to an extension if exigency so desire.

“Said appointee shall be chosen from a list of three (3) nominees as recommended by a general assembly of senior citizen organization in the city or municipality.”

So, klaro kaayo sa balaud nga kinahanglan nga dunay OSCA office ang matag siyudad o lungsod nga pagapangulohan sa usa ka OSCA Head. Ang pulong “shall” nagpasabut kini nga mandatory.

Ug sa IRR sa RA 9994, ang extension sa term sa OSCA Head, kon gikinahanglan man, dili molapas og tulo ka bulan. Ang mga katungdanan sa OSCA Head naglangkob ning mosunod: a) Pagplano, pag-ugmad, pagpatuman, paghiusa sa mga kalihokan, ug pag-monitor sa tinuig nga mga programa sa mga senior citizen subay sa mga lagda ug katuyoan sa Balaud;

b) Paghimo’g talaan sa mga serbisyo  nga mahimong ikatanyag sa nagkalainlaing pederasyon ug kahugpongan sa mga senior citizens;

c) Pag-maintain og talaan sa mga senior citizens ug pag-issue og ID cards ug purchase booklets, walay bayad nga mahimong madawat o valido sa tnang dapit sa nasud;

d) Mahimong general information ug liaison center aron kaalagaran ug matubag ang mga panginahanlang sa mga senior citizens;

e) Pag-monitor nga mapatuman ang mga provision sa RA 9994 ilabina ang mahitungod sa panghatag og diskwento ug mga pribilihiyo sa mga senior citizen;

f) Pagtaho ngadto sa Mayor sa bisan unsang kalapasan nga mahimo sa usa ka molupyo, o mga patigayon ug establisamento batok sa RA 9994 ug sa mga lagda ug regulasyon niini;

g) Pagtukod sa labing dali nga panahon sa city/municipality coordinating ang monitoring board nga pagasakpan sa OSCA Head, City/Municipal Social Work & Development Officer, ug sa mga presidente sa nagkalainlaing kahugpongan sa mga senior citizen nga maoy motagad sa madawat nga mga reklamo;

h) Pag-asister sa mga senior citizen nga mopasaka og sumbong batok sa nakalapas sa RA 9994 artubangan sa Departamento sa Hustisya, sa Provincial Prosecutor’s Office, ug sa ubng mga korte sa siyudad o sa munisipiyo.

So, dili tiaw ang mga katungdanan sa usa ka OSCA Head, ug daku ang atong katingala ngano nga ang unang city administration wala man magpakabana pagtudlo og OSCA Head?

By the way, samtang wala pa kita makapili sa mga nominees pagka-OSCA Head kay buot ni Mayor Edgar Labella nga ipaagi gayud sa tukmang proseso, ug ang matudlo nga OSCA Head hinashasan gayud ug highly qualified to the position, si kanhi OSCA Head Doming Chaves gitudlo nga ad interim OSCA Head.