Kun mahimo pa lang balibaran
MGA LAMAS SA KINABUHI - Fr. Rey Cui (Banat) - July 17, 2019 - 12:00am

Apan dili mahimong balibaran ang kamatayon. Kini ang giingon sa maong tawo ngari nako. Nakigbatok siya sa sakit nga kanser ug nakig bargain siya sa Ginoo nga unta kun mahimo hatagan lang siya bisan og pulo na lang ka tuig tangkod pud nga modagko ang iyang mga anak ug makabarog na sa ilang kaugalingong mga tiil. Apan sa iyang kaugalingong panahom ug pagbati haduol na gyud ang kamatayon. Iyang kapikas naundang sa trabaho aron siya maalagaran ug maatiman. Apan bisan pa man ning maong hitabo nakita ko sa iyang panagway ang kalinaw sa iyang disposisyon. Walay mga pulong nga nigawas sa akong baba. Gawas sa pag-ampo igo lamang kong nipikpik ug nihapuhap sa nagluya niyang mga abaga dinuyogan sa ginhawang lawom ug panghupaw nga way sama. Lisud gyud diay ang kinabuhi karong mga panahona.  May gitunol siyang sobre apan wa nako dawata. Wala lang tuyoa nga gikuptan niya ang akong bukton ug nidanguyngoy siya taman sa ginhawa dungan ang pag-ingon nga unta iampo siya nga mabatonan niya ang kaayohan sa sakit nga bisan ang doctor niingon nga wala nay alibyo.

Sa atong kinabuhi kita mahimong mga masukod sa duha ka mga punto. Ang unang punto sa higayon nga sukdon ang atong pailob kun kita walay atoa o ang atong kamapaubsanon sa panahon nga nahuptan nato ang daghan. Sa panahon sa kalisdanan mahimong kita irritable ug gani kawad-an sa paglaum. Sa panahon sa kadaghan nagtuo kita na ang gamhanan. Sa laktod nahimong nahikalimot kita sa tinubdan sa tanan natong grasya nga mao ang Dios.

Gisud-ong ko ang maong linalang nga nakigbisog sa iyang kinabuhi tungod ug alang sa iyang mga anak ug sa iyang pamilya. Wala lang tuyoa nga nitulo pud ang akong mga luha. Ngano man pud tawon nga nahimong dili man gyud pugngan sa Dios ang iyang kamatayon ug nganong dili man niya hatagan unta sa hangyo nga lugway ang kinabuhi niya nga kinahanglanon kaayo. Dili ba balido ang maong rason? Apan sa akong kaugalingon nakita ko usab ang akong kaugalingong kahadlok. Kahadlok pud unya sa akong kamatayon. Dili tungod kay duna koy gikawilihan kondili tungod kay daghan kong mga pangandoy nga buot untang gambalayon. Apan nganong ako man gyud himoong goals ang daghang mahimo? Dili ba paigo ang paghimo og maayo adlaw adlaw sa kinabuhi bahala na og ginagmay apan kanunay? Apan alang nako bisan unsaon pa nako og himo og mga ideya apan lisud gyud tuod pagdawat sa matuod labina kun kita na ang himatyon.

Niuli ko sa akong pinuy-anan sa Mohon ug sa dihang nakita ko ang mga nagkatag nga mga karton diin pagasudlan sa mga gamit ug mga libro. Mubo ra gyud ang kinabuhi ug kining maong kinabuhi angayan lamang nga saulogon uban ang kalipay ug kamanggihatagon. Kay ning kalibutana wala na tay laing pamatud-an gawas sa pagpuyo sa kinabuhing buotan. Kay mag-unsa man tuod kun anaa na nato ang tanan apan mamahimong idlas alang kanato ang kaluwasan?

DIOS
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with