Walay sukod nga Gugma

Daghan ang natandog sa kaagi sa magtiayong Gregorio ug Pinky Velasco nga bisan sa dako kaayong pagsuway ila gihapon kining gisungason nga walay reklamo.

Si Pinky adunay stage 4 ovarian cancer nga na diagnose niadto lang nakalabayng buwan.

Abi gani nila og appendicitis lang dihang nisakit ang tiyan ni Pinky apan didto na nasayran nga cancer diay sa ovary ug anaa na sa stage 4.

Nahugno ang kalibutan sa magtiayon unsaon paglabang ang dakong hagit sa ilang kinabuhi ilabi na nga duna silay duha ka mga anak ug igo igo ra usab ang ilang kita.

Apan wala nila kwestyona ang Ginoo nganong nahitabo kini tungod sa dako nilang pagtoo Kaniya.

Ang magtiayon 13 ka tuig nang nakasal sa sibil apan damgo nilang duha nga makasal atubangan sa pari.

Nahatagan kini og katumanan diin sobra sobra pa sanglit tulo ka pari ang nagpahiluna sa kasal ug labaw sa tanan unom ka Sakramento ang ilang gidawat.

Gawas sa kasal, gidawat usab ni Pinky ang hilog o annointing of the sick, Eukaristiya, samtang sa iyang bana ang bunyag,ug  kompirma.

Nag-ampo silang duha nga mao kini ang dalan sa giampo nga hingpit nga kaayohan ni Pinky.

Walay makalupig sa gahum sa Ginoo bisan ang cancer nga gihambin ni Pinky busa padayon ang lig-on nga pagtoo nila sa Dios.

Matod sa mga pari nga mikasal kanila nga record breaking ang nahitabo tungod kay sila pa lang ang nakadawat ug unom ka Sakramento sa usa lang ka higayon.

Ang gugma bisan gitay-og og gamhanang pagsulay apan magpabilin kining lig-on basta dunay panalangin sa Ginoo.

Sa hagit nga giatubang nila karon kinahanglan nila ang hugot nga suporta sa katilingban.

Kini ilabi na gikinahanglan sa pagpatambal sa cancer ni Pinky.