Wa suportahi sa amahan ang mga bata

Dear Atty. Divine,

Duna koy tulo ka anak og ang amahan nila usa ka Koreano. Dili mi kasal  apan iyang gi-acknowledge ang mga bata og iyang apelyido ang gigamit niini. Nagbuwag mi sa ilang amahan since last year. At first, nagsuporta pa siya sa mga bata apan karon panagsa na siya mopadala og kwarta. Ang akong pangutana kun pwede ba ko mo demand niya og support sa mga bata bisan kun di mi kasal?  Daghang salamat.

Gina

* * *

Dear Gina,

Yes, bisan kun di mo kasal sa Koreano aduna gihapon kay katungod nga mo-demand og support alang sa inyong tulo ka mga anak. Basi sa atong Family Code ang mga illegitimate children entitled og support gikan sa ilang biological father. Sa imo nga kaso, gi-acknowledge ang imong mga anak so way rason nga di siya mosuporta niini. Ang una nimong buhaton mao ang pagpadala og demand letter sa amahan sa imong mga anak  pinaagi sa imong lawyer. Kun iyang  ibalewala ang imong demand letter then pwede kang modangop sa korte pinaagi sa pag-file  og Petition for Support. Pwede sad nga criminal case ang imong i-file violation sa Anti-Violence Women and their Children ug kun mapatud-an siya niini mamahimo siyang mabilanggo. Thanks and God bless.

Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado  ug Domingo.