Mapinanggaong paagi sa pagdaog

Human na ang hugawng 2019 midterm elections sa Pilipinas. Hangtod karon daghan ang nahibulong nganong hasta kinalig-onang kandidato sa ila mismong lugar nga gihimong gingharian ning tadhang kandidato sulod sa pipila ka dekada, sa kalit, ingon sa nahisama sa punoan sa saging, humok ra kaayong gituba-tumba ning panahon sa administrasiyon ni Presidente Duterte.

Kon ubay-ubayng siyudad nga nahimong kalayo ang panagbugno sa magkaatbang kandidato diha sa matang sa election machinery nga gigamit niadtong ilang pagpangampanya, ang siyudad sa Talisay, ikatandi sa malinawong dagat, diin bisag gihasmagan sa mapangahasong hangin nga dumagsa, ang mga balod nagpabiling gagmay ug wala gyod mahimong mangtas ug dagko.

Busa, naangkon sa mga lumolupyo ang hapsay ug tin-aw’ng resulta sa eleksiyon.  Sa tumang kasayon, midaog si Gerald ‘Samsam’ V. Gullas Jr. pagkamayor sa Talisay City pinaagi sa nagbahang winning landslide votes.

Nagmalamposon siya sa pagpakigparang-pilde sa iyang kaatbang.

Apan ang iyang pagpakig-away wala matapos dinhi. Sinugdanan pa lang kini sa iyang pagpadayon og pakigbugno sa lain na usab nga matang sa mga kaaway nga giatubang ning iyang paglingkod sa City Hall, isip bag-ong amahan sa siyudad. 

Gikan sa nagtipun-og nga bahong basura, ngadto na sa kahuot sa trapiko sa nagmug-ot ug gipaningot nga kadalanan, pipila lamang kini sa iyang mga higanteng kaaway nga mihagit sa katakos ni Samsam unsaon niya pagpilde silang tanan.

Anaa pay problema sa gidiling drugas, hospitalization assistance, edukasiyon, paghimog green land sa naupaw nang kabukiran, pagmintinar sa usa ka malinis nga palibot ug daghan pa, nga halos dili na maihap sa mga tudlo - mao kini ang ikaharong nga mga kaaway sa kugihang mayor diha sa iyang pagpangalagad. 

Hinuon, gipanigkamotan ni Samsam ang paghinayhinayg sulbad ning nagpasad nga suliran sa iyang halapad nga balwarte.

Gani, niining bag-o lang, giawhag niya ang tanang taga Talisaynon nga manglimpyo pirme sa ilang nataran.

Kay kinsa kadtong barangay ug eskuylahan nga makita ug mahukman nga maoy kinalimpiyohan sa tanan, makadawat og premyo gikan sa kagamhanan sa siyudad.

Pagka-very encouraging and positive approach! Pagdasig gikan sa usa ka mapinanggaong kasingkasing, diin kon tumanon lang sa katawhan, maangkon ang tam-is nga kadaogan dili lang ni Samsam, kondili, nilang tanan.