Si Ariel Vallega

May classmate ko sa seminaryo kaniadto. Ariel Vallega ang ngalan. Buotan to nga bata, utokan ug sa kaparian sinaligan.

Sa panahon sa akong kalisdanan kaniadto mohatag siya sa iyang inigsuong pagmaymay. Dili siya dawo sa iyang mga nakat-onan.

Gani tabang siya sa pag-edit sa akong thesis kaniadto. Ang tanan nahimong handumanan na lang. Niadto siya sa Saudi ug nitrabaho didto isip magtutudlo.

Dugay na siya didto ug wala na gani koy balita kalabot niya. Apan sa dihang nabasahan ko sa Group Chat akong nasayran nga nipanaw na diay siya. Wala na si Ariel.

Ang iyang kamatayon nagpahinumdom lamang nga sa hinayhinay gipang-harvest na tingali ang among batch matud pang Chairman Rommel Bacuajon wa na Cui kinsa kaha ang mosunod ini?

Pahiyom ang akong natubag apan dili ikalimod nga bation pud ang kakulba. Tinuod sa makadaghan ako nagpunay og yawit nga angayan natong pangandaman ang atong kamatayon apan kun buot hunahunaon hadlok lang ta sa gihapon.

Kining tanan akong gihanduraw samtang akong gihimo ang pagbalik lantaw sa kagahapon uban ni Ayee. Sa mga Domingo padung ang Vespers magkuyog mi usahay sa pag-ampo sa Santos nga Rosaryo. Sa mga gabii nga magtabi ug magpalabay sa oras uban ang mga barkada. Sa higayon nga daghan ming nahiagom sa silot ni Father Prefect ug sa mga higayon nga malipayon namong gikab-ot ang kalampusan panahon sa graduation.

Apan ang tanan nahimong handumanan na lang. Wala na siya sa kalibutan sa mga buhi apan nagpabilin siyang buhi sa hunahuna ug kasingkasing sa iyang mga classmates. Bisan unsaon mangamatay gyud kita sa gihapon.

Kining maong kamatuoran nga nagpunay og balik sa atong kasinatian unta magdasig kanato sa pagpadayon diha sa paghimo og maayo alang sa uban.Kay mag-unsa man tuod ang daghan mong bahandi apan way kahulogan ang imong kinabuhi….Ariel bisan asa ka man karon unta magpabilin kang malipayon.

Salamat sa kahigayonan ug panaghigala nga imong gipaambit kanamo. Suod mong Michael Tahanlangit ingon man ni Hernani Jumao-as kamong tulo ang mga pinalanggang mga alalay ni Padre Eric Raveza ug ni Mike de Silva. Unta diha sa langit ikaw na unta ang usa sa among mga prayer warriors. Adios!