Haguka nga pamunoan

Kaguol ug kalagot maoy imong bation sa kasayuran nga daghan sa mga school supplies ug mga libro gikan sa Kapitolyo ang napalgan sulod sa usa ka junkshop didto sa Barangay Canduman, Mandaue City. Si Provincial General Services Office chief Bernard Calderon mipahibawo nga ilang nadiskubrehan nga dunay 200 ka set sa school supplies alang sa Grade 3 ug 584 set alang sa Grade 4. Gawas niini duna say 135 ka mga libro sa kasaysayan sa kalungsoran sa probinsiya.

Ang maong mga libro produkto sa history writing contest nga gipasiugdahan kaniadto ni Gobernador Gwen Garcia ubos sa pagpakig-alayon sa Cebuano Studies Center sa University of San Carlos. Matud ni Calderon nailhan na nila ang kawani nga responsabli pagbaligya sa maong mga libro ug school supplies. Ang maong kawani girelibohan na sa katungdanan ug gipaubos sa imbistigasyon.

Makaguol nga samtang daghan ang mga tinun-an nga nagkinahanglan og school supplies imong makita ang mga notebook ug uban pa nga gamit sa tunghaan ang gi-usikan. Daghan sa mga estudyante ang naglisod intawon pagpalit og notebook, ang uban nila tingali nag-recycle sa ilang mga karaang mga notebooks pinaagi sa pagtahi niini aron lang dunay magamit.

Ang mga history books nga gipanglabay dili kabayran og sapi tunfod sa ka importante niini. Daghan ang nangita og kopya sa maong mga history books apan wala makabaton sa kahigayonan nga mabasa tungod kay way kopya nga available.

Makapungot nga samtang ingon niini ang sitwasyon, gipatimbang lang ang maong mga libro sa kantidad nga piso matag kilo. Angayang manubag dili lang ang kawani nga nagbaligya kun dili apil na ang mga opisyal sa miaging administrasyon. Sa ka dako sa panginahanglan nganong ilang gitipigan ang maong mga school supplies ug mga libro? Timailhan ni sa haguka ug iresponsable nga pamunoan sa milabay nga gobernador. Siya apil na ang department head nga dunay tahas sa pag-apud-apod sa maong mga supply ang angayang manubag sa katawhan ug sa balaod.