Nganong gihatag mo man?

Anaa gyud ang tentasyon. Bisan asa dili kita luwas niini. Ang ig-on niini kasagaran mao man ang atong lower appetites mao nga kun dili lig-on ang atong baruganan nan, mamahimong matental gyud ang tanan. Mura kini og SALAD.

Sayon, Lami ug Dali apan kun dili kita magbantay nan, maunsa man kaha ang tanan kun ugaling manimawos ug maningil ang binuhatan unsaon man nato kini pagbayad?

Anaa ang rason busa angayan lamang nga atong hunahunaon sa makadaghan ang tanan sa dili pa kita mohimo og bisan unsang lakang.

Apan kay lagi tawo lamang kita, dali ra gyud kaayo ang paghaylo kanato.

Tinuod man kini ug kay tinuod man duna kitay mahimo alang niini. Unsa man kaha ang atong himoon?

1. Una, mao gyud ang pag-ampo. Ang grasya sa Dios anaa man gyud sa kanunay mao nga dili maayo nga ato kining ipakagamay.

2. Ikaduha, paglikay sa bisan unsa nga makadaut nato. Kay ang pagladlad sa kaugalingon sa kadautan mao gyud ang magdala kaniya sa kalaglagan.

3. Patabang sa mga tawo nga motabang gyud sa tinuod dili tong mga tawo nga maayo lang mohatag og tambag apan mga bantay salakay sa imong kahuyang.

4. Human ka masayop pagkat-on sa maong sayop. Igo na tingali kini aron ikaw mahigmata sa matuod.

Sa akong panaw nakita ko ang gahum sa Dios usahay ako lang kining gibalewala apan human sa tanang mga hitabo nga makapamata kanako nakita ko nga importante gyud nga akong paminawon ang mga pagmaymay alang sa matag usa kanato.

Batonan ang kahadlok sa sala aron magpuyo kita diha sa gugma ug kadait nga Diosnon.

Hinumdomi dili tinalawan ang paglikay. Ang tawong isog maantigo kanus-a siya moasdang sa pakig-away.