Ibilin kaniya ang yukbo sa pakigdait

Hulyo 7, 2019: Ikanapulog-Upat nga Domingo Sulod sa Tuig

Mga Pagbasa:  Is. 66;10-14/Sal. 66/Gal. 6;14-18/Lk. 10;1-9

Usa sa mga nindot nga buhaton mao gyud ang pagduaw sa usa ka pamilya ug panimalay. Kaniadto sa akong pagsugod sa among parokya dinhi sa Mohon gihimo dayon namo ang Home Visitation. Tumong ug tuyo niini mao man ang pag ila ila sa mga tawo. Kapoy man tuod tong buhata apan malipayon ra pud kaayo ang matag usa.

Daghan man ko og nakat-onan nga mga bag-ong kamatuoran. Ang atong Ginoo ning atong ebanghelyo karon ang nihimo og mas duol nga sa katawhan.

Ang iyang gigamit nga pamaagi mao ang mission immersion diin iyang gi require ang iyang mga tinun-an nga mopuyo sa balay ni bisan kinsa nga ilang pagaadtoan dinala ang ilang mga panalangin ug pag-ampo, modawat ug makontento sa bisan unsa nga ihatag ug dili mangita og wala diha. Gawas pa gitudloan niya ang iyang mga tinun-an nga dili mamugos kun ugaling dili sila dawaton sa katawhan.

Karong mga panahona nahimong idlas kaayo ang pakigdait.

Atong madungog sa matag karon ug unya ang mga balita nga naghisgot og kagubot, patay ug uban pang kapintas.  Ang Ebanghelyo anha lang sa natad sa simbahan ug wala sa kabalayan. Ang resulta mao nga nahimong ritwal na lang ang tanan.

Tinuod kada usa nato nangindahay nga mohimo og maayo ug mosangyaw ug bisan unsa nga pang Ginoo apan dili ikalimod nga kadaghanan nato dunay mga hang-ups ingon man mga kahadlok.

Mao nga malisud alang nato ang pag-venture sa bisan unsa nga dili nato sinati buot lang natong magpabilin sa atong tagsa tagsa ka mga comfort zones. Tinuod dunay mga tawo nga magdumili pagdawat nato ug sa atong pagtulon-an apan mas maayo nga ipanghatag sa gihapon ang atong yukbo sa pakigdait.

Sa atong pagsunod sa mga tunob ni Kristo atong hinumdoman kining mosunod:

1. Una, Angkonon nato nga tanan lumalabay ra gyud mao nga dili maayong mahigot.

2. Ikaduha, ayaw kahadlok kun ugaling nagkuwang ka sa bisan unsang butang material. Ang Dios sa kanunay mohatag ug gani ihatag niya labaw pa sa atong mahakgom.  Ang mahinungdanon salig lang gyud ta sa iyang Pag-Amoma.

3. Panaw diha sa tumang kagaan ang daghag dala maoy makapahimo sa panaw nga langay ug walay kapaingnan.

4. Sa katapusan, pahiyom ni bisan kinsa nga imong ikahibalag ning maong simpleng buhat sa pagpakabana sa presensiya sa uban makapalipay nimo ug nila sa hilabihan.