Pagsangyaw

Dakong kasaulogan sa pagtoong Kristiyano ang gipangandaman karon sa simbahang Katoliko, ang ika-500 ka tuig nga paghangop nato sa Kristiyanimso.

Ang Sugbo maoy nahimong duyan o Cradle of Christianity busa haum lang nga pangandaman nato ang umaabot nga grand celebration.

Apan kutob naman lang ba kita sa kasaulogan sa atong pagka kristiyanos? unsa man ang nahimo nato sa atong pagtoo nga pinasubay sa kinabuhi ni Kristo?

Sulod sa 500 ka tuig nga gihangop nato ang Kristiyanismo nasabtan ba nato kini ug labaw sa tanan ato ba nga gipuy-an ang atong kinahuhing Kristohanon?

Ang mga hiyas ug mithi isip usa ka tinood nga Kristiyanos ang tinguha nga isilsil sa alimpatakan ug galamhan o sa kinatibuk-an nato nga pagkatawo sa gilusad nga programa’ng “Pagsangyaw 2021”.

Gipasiugdahan kini sa hiniusang paningkamot sa mga hugpong sa Simbahang Katoliko nga gipangulohan ang pagpatuman sa Commission on the Laity pinaagi sa grupo.

Gilusad ang Pagsangyaw niadtong buwan sa Marso ning tuiga diin gihimo ang mga senemanang pagtulon-an  gikan sa Catholic Bishops Conference of the Philippines (CBCP) ug uban pang mga kalihokan sama sa integrated evangelization alang sa 2021 celebration.

Daghang mga hagit ang nasugatan sa mga nagpasiugda sa pagpatuman sa ilang mission nga pagpahibawo sa katawhan kalabot sa maayong balita sa atong pagtoo nga Katoliko.

Adunay mga tawo nga daw baliwala lang ang unod sa pagsangyaw apan mas daghan ang mihangop kinsa aktibo nga nahimong kabahin sa evangelization.

Ilusad na ang season 2 sa Pagsangyaw diin mas positibo ug determinado ang mga organizers nga makab-ot nila ang ilang tumong.

Dako pa sila og trabahoon ilabi na sa pagdawat sa mga tawo apan pinaagi sa sobsob nga pagsangyaw nila motaas ang awareness level sa mga magtotoo sa kamahinungdanon sa pagsunod sa tunob ni Kristo isip Iyang mga sumusunod.