Unang mensahe ni Samsam

Dili mi magkaila ni newly Talisay City mayor-elect Gerald Anthony ‘Samsam’ V. Gullas kay sukad wala pa man gyud kami magkahimamatay sa personal ug nagkapig-itay among palad sama sa mga sulom nga magdinul-itay ang  sungo matag higayon nga magkatagbo ilang dalan sa lunhawng sanga nga ilang gilatayan.

Apan hagbay ra siyang nasuod sa akong kasingkasing, sanglit pinaagi sa tabiang tri-media, nasundan nako ang mga bulawanong tunob sa iyang pagka sulondong lider ug pagkasuloguon sa lungsod, siyudad o distrito.

Kaaway nako ang mga daotang buhat sama sa korapsiyon, panikas ug pamintaha. Pangandoy ko kanunay ang usa ka malinis ug honest nga panggobiyerno, diin kining kinaiyaha nakita ko diha sa pagpangalagad ni Samsam.

Gani, dinhay eleksiyon nga paglansar ni Samsam pagka Kongresista, midaog siya daan. Sanglit wala siya’y kontra.

Sa miaging eleksiyon, diin nagpapili siya pagka mayor sa Talisay City, landslide winning votes ang naani niya, bunga sa  maayong binhi nga iyang gitanom sa kasingkasing sa katawhan.

Ug sa unang adlaw sa iyang paglingkod, gimiting ang tanang empleyado aron ipaambit ang iyang unang mensahe nga puno sa kamaundanon.

Niay pipila ka pudyot nga akong napunitan. Matod pa niya:

“Being able to work in City Hall is a privilege. You should take pride and honor nga nagtrabaho ka sa City Hall. 

To tell you the truth…daghan kaayong tawo sa Talisay karon would love to be working, hoping and praying to be in the position you are all in today.  Ang ako lang hangyo ninyo for three years (June 30, 2019 – June 30, 2022) is kanang kinasingkasing nga serbisyo kaninyong tanan… The biggest asset of the government is its people.

Bisag pila pa na imong budget, imong IRA, bisag binilyon pa nang imong local income kon ang tawo nga miimplementar sa proyekto, programa sa gobyerno walay kasingkasing nga serbisyo, dili matagamtaman sa mga tawo ang serbisyo gikan sa ilang gobiyerno.”

Pagka-simple nga mensahe. Pero nagdalag bug-at nga responsibilidad sa tanang kawani sa Talisay City Hall. Kinasingkasing nga hangyo gikan sa buotang mayor.

Busa, angay lang usab sukliag kinasingkasing nga pagtahod sa tanang hingtungdan kang kansang kapanginabuhian gipandongan sa mga mapinaggaong pako ni Samsam.  Busa, kinahanglang ampingan.