Basura mo ibulsa mo

Gusto sa mayor-elect Edgardo Labella nga wala nay landfill dinhi sa dakbayan sa Sugbo. Maoy iyang gusto nga adto ilabay sa landfill nga gawas sa dakbayan ang mga basura niini.

Ang gusto sa bag-ong mayor nakasugat og nagkalain-laing reaction. May misupak ug may miuyon. Pero mas daghan ang misupak ilabina ang mga taga dapit nga anaa mahimutang ang landfill ug adto ilabay ang basura sa dakbayan sa Sugbo.

Kun imong sumadahon ang pamahayag sa mga nagpadayag sa ilang pagsupak mahisama sa pulong “Basura mo, ibulsa mo.”

Adunay punto ang mga nagpadayag sa ilang pagsupak sa laraw nga posibleng mahimong patakaran sa bag-ong administrasyon nga maoy magdala sa renda sa kagamhanan sa dakbayan sa Sugbo.

Ang ilang punto, nganong adto man ilabay sa laing dapit ang basura sa dakbayan sa Sugbo? Nganong himuon man niini nga labayanan og basura ang mga lugar nga prisko pa kaayo ang hangin?

Nganong dili man ilabay sa Barangay Binaliw ang basura sa dakbayan sa Sugbo?

Tungod ba kay mireklamo ang mga molupyo sa kabaho niini? Kay ngano ang mga tawo nga nagpuyo sa dapit diini adto ilabay ang basura sa Sugbo dili diay sila mabahoan?

In fairness, dili sayop ni Labella kun adto ilabay ang basura sa landfill nga gawas sa Metro Cebu areas. Walay dili gusto og basura ug baho.

Dili pod molabay og basura ang bag-ong mayor sa dapit nga walay pagtugot.

Kun ilabay man sa dakbayan sa Sugbo ang iyang basura sa gawas sa Metro Cebu areas dili ni niya sala kun dili sala kini sa mga dapit nga mitugot nga malabayan og basura ang ilang dapit og basura.

Walay lain nga mabasol kun nahimo mang labayanan og basura ang usa ka dapit kondili ang ilang mga opisyal.