Human sa tanan

Dili ikalimod nga usahay mamahimong attached kaayo kita sa atong mga napondar ug nahimo. Apan kun buot hunahunaon dili kita angayang mahigot kay kun sa higayon nga kita mahigot malisud alang nato ang pagpanaw sa laing hugna ug anib sa atong kinabuhi.

Sama gud na pananglit sa kinabuhi sa usa ka magtutukod. Ang magtutukod human siya makatukod dili maayo nga mahigugma lamang sa iyang natukod kondili maantigo siyang i delegate o itahan ang bisan unsang iyang napundar sa kinabuhi ngadto sa mga tawo nga giisip niyang mopadayon sa bisan unsa nga iyang nasugdan.

Apan kun ugaling dili sila mopadayon nan, dili siya angay nga mabalaka kay ang Dios molihok sa paagi nga katingalahan ug dili sibo lang sa gusto sa hingtungdan.

Human sa tanan angayan kang mobiya aron ang nahabilin makapadayon sa ilang kinabuhi ug ikaw mismo makapadayon usab sa imong panaw nga gilatid alang kanimo sa kahitas-an.

Adunay sinugdanan ug katapusan ang matag tawo gani ang atong mga ginikanan mohalin naman lang ug kita mismo nga ilang mga anak kita usab mohalin ug mahanaw sa atong gibarogan nga kalibutan.

Ingon ini ang kinabuhi may sinugdanan ug may katapusan apan padayon gihapong mabuhi ug mamahimong imortal ang matag usa kanato kun tugotan nato ang atong mga maayong mga buhat nga maoy mopapitik sa mga kasingkasing sa atong isigka ingon. Diha s atong paghimo sa atong kaugalingon nga mga maayong sanglitanan sa uban mamahimo kitang buhi sa hunahuna ug kasingkasing sa uban. Sa nagkaupos ang mga tinagiktik sa lingganay sa atong panahon, angayan kitang mohimo ning mosunod:

1. Pagtinarong sa karon ug dili sa ugma kay ang ugma wala nay seguro.

2. Paghatag sa yano apan matinud-anong pahiyom aron malipay ang uban dako na kaayo og kahimoan aron mamahimong gaan gaan ang kinabuhi ug mga suliran nga gipas-an.

3. Pagpasalamat sa kanunay nga bisan pa man sa kalisdanan nakahimo gihapon kita sa paghatag.

4. Paghangop sa sakit nga sakripisyo aron maayo ang samad sa emosyonal nga pagkabangkaruta gumikan sa mapait nga kagahapon.

5. Pag-ampo sa panalangin nga maabot sa matag usa inay ang pagsangpit sa tunglo nga modaut ug molaglag bisan sa mga nagtunglo.

Sa laktod atong gamiton sa husto ang atong gahum sa pagpili kay human sa tanan ang Dios dili mangutana kun nga nahimo ba kitang malampuson.

Pangutana niya kanato kun nahimo ba kitang mahigugmaon. Ikaw nagmahigugmaon ka ba sa imong isig kaingon?