Populasyon sa CPDRC nagkahiyos

Dakong problema sa mga jail facility ang hilabihan ka dasok sa mga binilanggo diin halos kada adlaw adunay masulod.

Kadaghanan sa mga inmates nalambigit sa illegal drugs nunot sa nagpadayon nga kampanya sa gobierno batok sa illegal drugs.

Gani tungod sa kadaghan sa mga binilanggo, magsinardinas sila sa pagkatulog o mag puli puli sa pagtulog tungod sa kahuot.

Kaniadto ingon usab niini ang sitwasyon sa Cebu Provincial Detention and Rehabilitation Center CPDRC nga miabot na gyud sa 4,000 ang populasyon gikan sa 1,500 nga capacity.

Tungod sa kadaghan gipahunong una ang pagdawat og mga binilanggo gikan sa kalungsoran.

Apan karon inanay na kining mihiyos o nakuha-kuhaan na ang mga binilianggo sa CPDRC diin 1,500 kapin na ang nahatagan og kagawasan nga bugti sa ilang good conduct.

Ang temporary freedom kasagaran nag gumikan sa plea bargain inabagan sa pag follow up sa proseso nga maoy gihimo sa nagdumala sa jail facility.

Ang mga personnel mismo sa CPDRC ang kanunay mag follow up sa korte ug sa ubang ahensya.

Hugot usab ang ilang pakiglambigit sa ubang mga ahensya sa gobiyerno sama sa Parole and Probation aron matabangan sa pagpadali ang paglaya sa mga inmates.

Ang gihimo sa CPDRC angayan nga sundogon sa ubang mga jail facilities kon gustong masolusyonan ang kahuot sa mga bilanggoan.

Labaw sa tanan matabangan ang mga PDL nga mapadali ang ilang pag angkon sa kagawasan.

Apan ang labing maayong himoon seguro sa mga tawo nga dili na makahimo og krimen aron dili na madugangan pa ang mga piniriso sulod sa prisohan.