Kitang mga Pilipino

Hunyo 23, 2019: Solemnidad sa balaang lawas ug dugo ni Cristo (Corpus Christi)

Mga Pagbasa:   Gen. 14;18-20/Sal. 110/1 Cor. 11;23-26/Lk. 9;11-17

Hilig kaayo og kaon. Dili tungod kay wala tay kaon apan tungod kay diha sa pagkaon anaa ang kahigayonan sa pakigkukabildo. Mao nga matag piyesta ug pangilin kita gyud mopauli sa ato. Sanglit mga meal oriented kita nga mga tawo mao nga dili malisud alang nato ang pag-appreciate sa bili sa Santos nga Misa. Kadaghanan sa mga espesyal nga okasyon sa atong kinabuhi. Magsugod kita sa pagsaulog sa Santos nga Misa dayon ato kining tapuson pinaagi sa pagsalo salo uban sa atong mga higala. Nahimo kitang usa sa kasingkasing ug hunahuna diha sa atong pagkaon ug pag-inambitay sa mga kasinatian.

Kun maghisgot kita og Santos nga Misa ang Dios nakighimamat kanato pinaagi sa kalan-on nga naghatag og kabusog ug kabaskog sa kalag. Ang maong panagtagbo nagpahinumdom nato nga ang Dios nagmanggihatagon dili lang sa bisan unsang butang kondili nagmanggihatagon siya sa iyang kaugalingon.

Ang ebanghelyo nagpadayag kanato nga bisan pa man kun  limitado ang supply sa pan ug sa isda apan nahitabo nga nabusog ang kadaghanan nga anaa niadtong mga higayona.Dili gyud diay imposible ang milagro labina kun dunay panag-ambitay sa panalangin. Kay after all kun maghisgot kita og blessing dunay dakong kalambigitan sa thanksgiving. Ang Eyukaristiya mahitungod sa pasalamat.

Mao nga angayan lamang nga diha sa atong pagpasalamat maantigo kitang mopaambit sa bisan nga atong nahuptan ngadto sa uban nga giisip natong nagkinahanglan. Dunay mga hinungdan nganong kita magpasalamat:

1. Una, kita tanan kabus atubangan sa Dios. Wala kitay atoa busa walay rason nga atong hakgumon ang dili nato madala.

2. Ikaduha, mas mahinungdanon ang relasyon kaysa bisan unsang butang. Mag-unsa man kun nahimo kang adunahan sa mata sa kalibutan apan napukan pud ang imong kaluwasan.

3.    Ikatulo, ang grasya sa Dios maoy naghimo kanatong bulahan busa angayan lamang nga dili kita maghinangol niini.

4. Ikaupat, ang Malipayong kinabuhi mahimong mapuy-an diha sa pagkamanggihatagon mao nga Blessed is the Cheerful Giver!

Bisan pa man kun ginamos ang atong sud-an kita modapit gihapon sa uban aron motambong sa atong kan-anan. Kini ang kahulogan sa Corpus Christi. Ang Dios walay gibalibaran sa matag higayon nga dunay panginahanglan. Kitang mga Pilipino sa pagdapit bahala og nagkalisud dili gyud hitupngan