Ang nailhan kong Eddie Garcia

Wala pa ko matawo, 1949 artista na si Eduardo Verchez Garcia o Eddie Garcia, diin usa siya sa mga casts sa pelikulang Siete Infantes de Lara, ang unang lilas nga maoy nakabirhen sa iyang abilidad sa pag-arte dihang gitaak niya ang paraiso sa showbiz.

Sama sa lamiang prutas, kutob sa direktor nga nakatilaw sa katanlas niyang modala sa bisan unsang script nga isangon ngadto sa iyang abaga, nahigalam. Kay ang produkto (salida) nga ilang gigama ug gibaligya sa publiko, kini moklik ug mokita gayod og dako sa takilya.

Gibanabana nga moabot sa 600 ka pelikula ug TV shows ang naapilan ni Eddie gikan sa iyang pagkahimugso, Mayo 2, 1929 hangtod Hunyo 20, 2019, diin paghagtik sa ika alas 4:55 sa hapon, nabugto ang iyang pagginhawa.

Nahasubo pag-ayo ang panagway sa taga showbiz, minilyong fans, ug sa GMA 7 Kapuso, kinsa wala gyod magtuo nga ang pagkasabod lang sa tiil ni Eddie sa kable panahon sa gihimo nilang shooting, maoy matang sa ending nga motik-op sa kataposang pahina sa iyang kinabuhi.

Adunahan si Eddie dili lang sa salapi ug bahandi. Usab, sa kapopularidad, isip usa ka banggiitan ug premyadong artista. Daghang fans ang nangandoy nga makakita-makahikap niya sa personal. Apan pipila lang kaha ang nakatiyempo?

Hinuon, tungod sa nature sa among trabaho, diin among trabahoan maoy himoong suroyanan sa mga artista, wala tuyoa, nahimamat ko si Eddie usa ka beses nga naglingkod sa paborito niyang lamesa. Tingale, 75 anyos pa siya niadto. Apan bata ug macho gihapon ang iyang porma. Mitulo god laway sa mga matrona.

Dili garboso si Eddie. Very simple and so friendly. Brandy with coffee ang iyang giinom niadtong mibisita siya sa among trabahoan. Pero, he drank moderately.

Gani, giingnan man mi niya nga mao kini ang usa sa mga sekretong nakapataas sa iyang resistensiya.

Si Eddie, sa edad nga 90, atua na. Nagtipun-og niyang bahandi ug daghang trophy sa kabantog gibilin ra gyod niya tanan dinhi sa yuta.

Kalag ra niya maoy mosaka sa itaas, diin base sa unsay iyang binuhatan dinhi sa kalibotan, atubangan sa Ginoo, hukman asa siya ibutang sa sunod kinabuhi nga mao na ang forever.