Panaw pa more
MGA LAMAS SA KINABUHI - Fr. Rey Cui (Banat) - June 21, 2019 - 12:00am

Halayo man tuod ang biyahe padung sa Sangi, Alegria apan sulit kaayo ang maong lakaw. Kuyog nako ang pipila mihimo kami og panaw sa mga dapit nga mamahimong kabahin sa laing hugna sa pakigbisog nga pastoral.

Akong gisuhid ang bag-ong dapit. May halapad nga wanang. Diyotay pa nuon ang mga tanom apan naseguro ko nga nindot kini nga kahigayonan sa pag-ugmad dili lang sa mga butang makita kondili sa mga butang usab nga magdala kanato kalinaw.

Ang tubig matud pa simbolo sa emosyon. Ang tingog sa mga balod sa dagat dako kaayo og kahimoan aron mamahimong ma-relax ang kaugalingon human sa kakapoy nga hilabihan.

Ang lawas maoy puhonan diha sa pagahimoong pakigkabildo sa uban. Mag-unsa man tuod ang imong nindot nga katuyoan kun huyang ang imong kalawasan?

Human sa hataas nga panaw dungan ang kukabildo sa driver nga higala ug sa mga kuyog nako, akong nakita ang kaanyag nga napatik diha sa mga karaang simbahan sa habagatan.

Ning maong mga simbahan napatik sa akong panumdoman ang bili sa kakaraanan. Kay unsa man diay ang anaa sa karaan nga dili mahimong biyaan?

1. Una, ang mga tawo wala mogukod sa takna. Gipasagdaan nila ang takna nga maoy mopupos sa ilang panahon. Kaniadto importante ang matag gutlo dili magdali ang tawo apan karon  bisan ako magdali tungod sa daghang trabaho.

2. Ikaduha, anaa ang proseso. Ang kan-on human mahaon dili una lamyon. Pasagdan kining mabugnaw una kan-on mao nga mga tiguwang lig-on sa gihapon og mga ngipon.

Dili sama nato karon human mohigop og init nga sabaw suyop pud dayon og bugnaw nga softdrinks.

3. Ikatulo, relasyonal kaayo ang duwa ug kasagaran dunay paugnat sa kusog. Apan kun mahitabo nga dunay masamdan moundang dayon aron ang naaksidente tabangon.

Karon ang mga tawo tungod sa mga online games nahimong impersonal ug usahay mahilig sa balikasnong mga pulong.

Tingali aron mamahimong mas ma internalize nila ang duwa. Ang resulta nahimong common na lang ang balikas bisan asa.

4. Ikaupat, gamhanan ang tingog sa kampana kay bisan ang molakawlakaw mohunong gyud aron mag-ampo. Apan karon bisan buk-on pa ang kampana padayon ang tanan sa ilang binuhatan.

Makamingaw ang kagahapon apan bisan pa niini padayon natong tahuron ang panahon. Dili maayo nga magdali sanglit matag adlaw bililhon. Labina gyud ang matag relasyon.

PASTOR
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with