Timaan sa kaalaotan
Nitingog na tuod si Presidente Rodrigo Duterte mahitungod sa pasangil sa pagbangga sa barko sa China sa Pilipinhon nga fishing boat nga Gem-Vir1 sa Recto Bank apan gilubog niya ang estorya.
Inay moangkon nga panahon na nga sublion ang atong relasyon uban sa China, kay di man ni unang insidente sa pagpanghasi nga nahiagoman sa mga Pilipinhon, naghisgot siya og gubat.
Ug pagpapas sa tanang pagduda nga may luna sa iyang kasingkasing alang sa mga biktima sa China, nipasidaan siya sa kalibotanong kadaot kun gamiton ang mga armas nukleyar.
* * *
Bisan sa daghang tambag nga iyang nadawat gikan sa mas nasuhito sa diplomasiya, niinsistir si Presidente Duterte sa taphaw niyang panglantaw nga duha ra ang kapilian sa pakiglambigit sa China: Ang pakighigala o ang pakiggubat.
Labaw nga nakapait mao ang lain niya nga pagtuo nga ang pakighigala sa China nagkinahanglan sa pagduko ug pagpa-awot nila ug pagpangutang bisan unsa ang ipahamtang nga mga kundisyon: Bisan mas dako ang interes, bisan gihimong kolateral ang mga pantalan, mga tugpahanan, mga isla, ug ubang kabtangan ug bisan giilog nila ang trabaho sa mga Pilipinhon.
* * *
Mamugos sab siya sa sayop nga pagtuo ang pagsukol sa China mosangpot sa gubat. Abunda ang mga ebidensiya nga bisan sa kusganon nga pagsukol sa Vietnam, Japan, Taiwan ug ubang kanasuran batok sa China, gawas nga wa mosangpot sa gubat, nakapugos sa China sa pag-atras ug paghunong sa ilang panghasi.
Ug ambot nganong siya ang nag-una og hisgot og armas nukleyar. Wa bay nakahunghong niya nga wa tay armas nukleyar?
* * *
Nabalaka ko nga gusto lang gyud si Presidente Duterte nga mosukwahi sa unsay naandan. Bahala na kon ang pipila sa gihimo sa niaging pamunoan nisangpot sa kaayuhan, sama sa pagdaog sa kaso batok sa China atubangan sa kalibotanong hukmanan.
Ug bahala na kun ang iyang pagsimang may bantang na nga mga timaan nga mahimong mosangpot sa kaalaotan.
Sama sa mas agresibo nga panghasi sa maritime militia sa China sa West Philippine Sea.
Nga bisan ang Recto Bank nga kabahin sa atong exclusive economic zone (EEZ) ug busa apil sa atong nasudnong teritoryo ila nang gipangisdaan ug ang mga nangahas sa pakigdungan ila nang gibanggaan.
* * *
- Latest
