Ting balimbing na!

Wala pa gani nakalingkod ang mga bag-ong napili sa nakalabayng eleksyon, karon pa lang inanay nang nag ilis og panit o nangluno na ang ubang mga politicko.

Sama usab sa huros sa hangin nga hapit na mausab ang direksyon, ang uban nga mga politiko na misabay na sa pagbali.

Kung sa prutas ting harvest na usab karon sa Balimbing nga inig ka tagak sa yuta o kaha inig ka pupo sa bunga mobali bali ra pud. Pastilan dili na kini bag-o pa kay mao gyud kini ang realidad sa politika sa atong nasod.

Sa kamada sa Dakbayan sa Sugbo, unang miisa sa iyang bandera mao si Konsehal Jerry Guardo sa BOPK kinsa mi anunsyo sa iyang suporta kang Mayor-elect Edgardo Labella.

Katarongan niya nga misanong siya sa panawagan alang sa kahiusahan ug panaguliay sa kabubot-on.

Dugang ni Guardo nga ang kaayohan sa kinabag-an ang iyang gitan-aw busa nakahukom siya sa pag suporta sa umaabot nga administrasyong Labella.

Hinoon kini si Guardo kanhi sakop sa Team Rama nga mitapon sa BOPK ug karon miabin na usab sa kampo sa PDP.

Kutob nalang sa Hunyo 30 si Guardo kay napilde man siya sa nakalabayng eleksyon, siya ang ikasiyam.

Apan duna pay dakong kahigayonan nga makasakay siya ugaling dili buligan sa kapalaran ang duha ka winning candidates sa BOPK nga konsehal Bebs Andales sa South District ug Alvin Arcilla sa North District.

Regardless kun personal interest o interest sa kinabag-an ang gilantaw ni Guardo sa pagbali ngadto sa PDP dili na kana mahinungdanon basta makatabang sa kalamboa  sa dakbayan ang iyang gihimo. Labaw sa tanan kun makaayo sa mga Sugboanon ang iyang aksyon aw suportahan nalang pud.  Kinsay mosunod nga mobalimbing? Basin ugma o sa sunod nga adlaw aduna na usay mo anunsyo sa ilang suporta sa umaabot nga pang gobierno sa dakbayan sa Sugbo.

Mag una man ang loyalty sa grupo o partido kon makamugna lang kini og negatibong resulta pinaagi sa kanunayng pagbabag sa mga proyekto.

Pwede ra man sila magpabilin sa BOPK o kaha mag independente basta ang importante nga lantawon nila ang katawhan nga maoy ilang giserbisyohan dili ang lider sa grupo.

Matod sa uban bahalag balimbing basta hilas!