Ang KAPA ug kita

Nahimong ninbansiwag sa mga pamantalaan ug halos sa tanang media outlets ang KAPA MINISTRY  nga nagpasabot og KABUS PADATUON. 

Mando ni Presidente Duterte nga kini sirad-an kay alang niya klaro man kaayo nga kini binuang.

Tiaw moy 30 porsiyento ang tubo sa imong capital nga 100,000 pesos?

Mao nga tinuod daghan ang mokubit ug kun atong paladman usa lang ang mensahe niini.

Nagpasabot kini nga daghan nato ang buot gyud magdato ug dili buot magpabilin diha sa nag-ilaid nga kakabus.

Mao nga daghan gihapon ang nangindahay nga mamahimong Instant Milyonaryo bisan pa man kun kining maong set up imposible kaayo.

Sa akong tan-aw niini, ang bisan unsang scam anaa gyud na. Gilibutan kita niini.

Ang uban gani involve man gyud niini. Anaa gyud sa tawo ang desisyon.

Apan lagi daghanan nato ang nagpantasya ning mga butanga.

Nagpantasya tungod kay lagi gitinguha nga mahaw-as sa bisan unsang pag-antos nga dili moagi og dugay nga proseso.

Ang negosyo dili lang mahitungod sa ginansiya kondili nakatabang ba gyud ni sa tinuoray sa mga tawong nagkinahanglan.

Basin baya nga ang pulong tabang gigamit lamang aron makapahimulos sa mga nagkinahanglan. 

Ning panahon karon daghan ang mga nagpasad nga mga bakakon mao nga ayaw dayon og tuo sa mga pasalig nga molambo ka sa imong kinabuhi.

Kinahanglan nga mohimo ka og imong personal nga panlimbasog kay imong isalig ang tanan sa uban unsaon naman lang kun sila nga imong gisaligan dili pud diay kasaligan?

Mas maayo pa nga diha sa atong pag invest bisan unsa bahala na lang kun ginagmay kini basta seguro ug makanunayon lamang.

Kay diha sa kinabuhi natong mga tawo ang bugtong saligan mao lamang ang Dios nga mohatag sa atong panginahanglan.

Dugang pa dili maayo nga attached ra kaayo sa kwarta kay basin sa kadugayan maulipon ra kita.

Ug kun maulipon kita nan, mahikawan kita sa tinud-anay nga diwa sa kalipay.

Sa akong pag open sa akong messenger dunay nihaylo og milyon ka dolyares nga return kun motabang ko sa iyang gusto apan anugon ang iyang katahum kay ang mga messages niya pulos man mga bakakon ug halayo sa tinuod.

Ambot lang ba kaha kun ang nawong niadtong bayhana tinuod pud kaha?

Igo lang ko sa panaguto bisan gani ang nawong sa tawo mahimo namang fake, samot na tingali ang kinaiya. Pastilan! ang KAPA ug Kita!