Nganong hikawan man?

Kun mapasar gayud kining maong balaudnon sa Konseho sa siyudad sa Sugbo, ginadili na unya ang pagbalhin og laing partido politikal alang sa usa ka pinili nga opisyal sa dakbayan sulod sa iyang termino.

Adunay public hearing nga gipahigayon kagahapon mahitungod sa maong proposed ordinance, nga gitawag og Anti-Turncoatism Ordinance. Gusto sa mga nagpaluyo niini nga makuha usab ang sintimento sa kinabag-ang katawhan mahitungod niini.

Apan miani usab og mga criticism ang maong ordinansa.

Alang sa mga mikontra niini, lisod kuno ang pag-epekto niini gumikan kay klaro kini nga usa ka klase sa paglapas sa tawhanong katungod sa mga lokal nga opisyal.

Hinuon, ordinaryo na dinhi sa nasud ang sige og pagbalhin sa mga pulitiko og partido.

Tungod lagi kay mga puti og sampot kining ubang mga pulitiko, bisan asa na lamang nga partido silang moambak alang sa ilang political interest.

Sa atong Konstitusyon, gitugot ang tanan paghangop og partido politikal nga gusto nilang sagopon. Dili kini ikatingala gumikan kay ania man kita nagpalandong ilalum sa pako sa demokrasya.

Sa akong nakita, dili angay nga pugngan ang atong mga lokal nga opisyal kon molukso man sila og partido. Kon nakita sa usa ka opisyal nga milihis na ang iyang partido sa kawsa nga iyang gihangop, nan katungod niyang mobalhin og laing partido.

Dako nga kalapasan sa katungod sa maong opisyal kon hikawan man siya sa katungod pagbiya sa iyang partido kon wala na siyay salig niini nga mosuporta sa iyang kawsa. Dili ba nga sukwahi kanang maong lakang sa lagda sa demokrasya?

Angay lamang nga hunahunaon sa mga sakop sa konseho kon makaayo ba kining maong sugyot nga ordinansa. Hinuon adunay daghang problema sa dakbayan nga maoy angay unahon paghatag og pagtagad sa atong Konseho.