Ilad
AMBOT LANG - Gerry Auxilio (Banat) - June 11, 2019 - 12:00am

Wala ko makasabot ug wala ko masayod unsay akong himuon dihang akong nadungog sa Balitang Bisdak niadtong miaging semana ang nahitabo sa akong kababayan nga Bol-anon nga naghikog human mailad sa gitawag og text scam.

Ang nailad nakadawat og text gikan sa usa ka Ramon Lopez nga nagpahibawo nga nakadaug siya og hapit usa ka milyon ka pesos ug aron makuha niya ang iyang nadaug kinahanglan nga mopadala siya niini og salapi alang sa pagprosiso.

Aron ang biktima dili madak-an sa gipangayo nga kantidad ni Ramon Lopez ang naulahi misugyot nga padata-datahan lang sa biktima ang bayad sa proseso hangtod nga kini maimpas ug mapadala napod ang iyang nadaug nga dakong kantidad.

Tungod niini, nangutang, namaligya ug namerinda sa ilang mga butang ang ginikanan sa batan-on aron lang mahatag ang gipangayo sa nagpailang Ramon Lopez nga halos kada adlaw motawag kay nangayo sa bayad sa proseso sa daug. Ulahi na nilang nahibaw-an nga ilad diay ang ilang nasudlan.

Tungod sa hitabo, naghikog ug namatay ang batan-on nga aduna pa untay daghang plano sa iyang kinabuhi.

Dili na bag-o ang text scam, dugay na kini kaayo. Ang text scam napagya na tungod kay nabalita na kini sa television, radyo ug pamantalaan tungod sa ka dakong ilad niini.

Maong wala ko makasabot ug wala ko masayod unsay akong himuon. Kasab-an ba nako ang akong kababayan nga Bol-anon kay nganong nagpailad sa klaro nang ilad.

Nganong wala kini magpakisayod sa wala pa mosanong ug mipadala og salapi sa mangingilad. Pero pagka wa ba pod nakoy puangod kun ako pa kining kasab-an o yawyawan kay nailad na gani ug namatyan na kasab-an pa.

Sa mga mangingilad ayaw pud tawon mi ninyo ilarang mga pobre. Kun mangilad man gani mo, mga dato lang ang ilara kay daghan man sila og kuwarta.

Kun ang dato ang inyong ilaron naa pay mahabilin nila pero kun kaming mga pobre ang inyong ilaron wala na gayod tawon.

Aron malikayan ang pagkailad, paglingi-lingi sa imong palibot ug pangutana. Kun makadawat man gani ka og text nga nag-ingon nga nakadaug ka, pangutana sa imong kaugalingon may giapilan ba ka nga raffle kay nganong nakadaug ka.

TEXT SCAM
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with