Padayon nga bugno

Niining naghinapos nga administrasyon ni Mayor Tomas Osmeña sa dakbayan sa Sugbo, kugi usab ang iyang mga kaalyado sa Konseho pag-arangkada sa ilang misyon pagsemento sa ilang interes diha sa South Road Properties.

Usa sa mga init nga isyu mao ang kaguliyang karon mahitungod sa 45 ka hektarya nga nahalin sa panahon sa administrasyon ni Michael Rama apan gipaningkamotan karon ni Osmeña ug mga kaalyado sa Konseho nga mainbalido.

Bisan pa sa desisyon sa Court of Appeals nga legal ug walang trampas ang pagbaligya sa maong lote diha sa SRP, padayon gihapon ang pagbabag niini sa Konseho sa mga sakop sa Bando Osmeña Pundok Kauswagan. Gusto sila nga napawalang bisa kini.

Ang mga sakop sa Konseho nga kaalyado ni Osmeña miaprubar sa usa ka resolusyon nga naghangyo sa City Legal Office nga mosang-at sa korte og petisyon alang sa deklaratory relief aron nga dili balido ang pagbaligya sa lote nga gi-deal niadtong Agosto 2015. Mora og buhaton gayud sa mga kaalyado sa outgoing nga administrasyon nga mapugngan ang pagbaligya sa maong lote niadtong panahon ni Rama. Kahinumdoman nga si Osmeña nagdumili sa pagdawat sa halin sa maong lote nga gibaligya ngadto sa tulo ka developer.

Bisan pa man sa desisyon sa Court of Appeals, pabilin nga nagmagahi ang kampo ni Osmeña ug karon padayon ang ilang pag-atake batok sa pagbaligya sa maong lote. Hinuon aduna pa silay Korte Suprema nga kadangpan.

Apan mao lagi, ang petisyon batok sa pagbaligya sa maong lote makapadugay lamang sa paningkamot pag-develop niini. Kini tungod sa dako nga bugnong legal ug ubang sa proseso didto sa kinatas-ang hukmanan.

Tungod niini, mismo ang siyudad ug ang mga molupyo niini mao na hinuon ang nabutang sa alanganin. Kay kun na-developed na unta kanang maong lote, liboan na unta ang nakabenepisyo niini pinaagi sa ilang pagpanarbaho. Kini gawas pa sa bilyones nga kitaon sa dakbayan isip buhis gikan sa mga magpapatigayon. 

Pait lagi kun puro na lamang pamolitika ang giatupag sa atong mga lideres. Tungod kay ang ilang kaugalingon lamang nga interes ang nagpasulabi, nakalimot na hinuon sila sa ilang misyon nga mao mismo ang pagserbisyo sa interes sa katawhan.