Hikog dili sulbad

Usa ray kinabuhi ang tawo. Gikan ni sa Ginoo. Iyang gipahulaman. Busa, angay  ampingan.

Tuig 1984, naminyo ko. Kada gabii gisaw-an namong misis ang gugmang among gipanumpaan atubangan sa altar sa Diyos.

Hasta kapila namo lupara ang langit matag hugna sa among pakigbisog, apan mi-1986 na lang, wala gyod mamunga ang binhing gitisok ko sa iyang sabakan.

Usa ka higayon niana, ang Committee on Spiritual Activities sa among trabahoan mipahigayon og tulo ka adlaw nga Charismatic seminar didto sa usa ka relihiyosong lawak sa Norkis Trading Company Incorporated sa Mandaue City.

Pulos dekalidad ang among charismatic facilitators niadtong higayona.

Daghan mig nakat-onan sa ilang deep testimonies nga gibase sa tinuoray nilang kasinatian - ang ups and downs sa kinabuhi, nga matod pa nila, mao ang krus, misyon ug eksam nga gituyo paghatag sa Ginoo ngari nato, diin kon makapasar ta sa maong pagsulay, kita mahalangit.

Unya, usa nila mihatag og testimoniya, unsay iyang gihimo dihang human sa lima ka tuig nilang kaminyoon, wala gyud sila tugahig anak.

Matud niya, iya pang gipahugtag maayo ang  pagsalig sa Ginoo.

Sa padulong na siya ug iyang asawa magdulog sa kama, moluhod kuno sila ug hugot mag-ampo nga unta, hatagan nag anak. Tuod man, kini natuman!

Nadasig ko sa ilang gihimo. Gisundog sab namong misis. Nagpatabang pod mi sa Inahan sa Kanunayng Panabang sa Redemptorist Church, diin usa ray among gihangyo, nga unta magka-anak mi. And God is good. Gitagaan gyod mig upat.

Nagdako among mga anak nga gipahimangnoan pirme unsa ka bililhon ang kinabuhi.

Samot na, dihang usa sa ilang amiga, naghikog kay wala gyod lagi makatilaw og gugma sa usa ka matuod nga amahan.

Samot na, dihang among silingang dalagita miambak-patay sa taas bilding human bulagi sa iyang uyab.

Ug samot na dihang usa ka estudyante naghikog kay nasakpang nanikas sa eksam. Amo gyong gisilsil sa ilang alimpatakan kining mosunod:

“Mga anak, ang hikog dili mao ang sulbad sa mga suliran.

Hinumdomi, nga ang Ginoo maoy tag-iya sa atong kinabuhi.

Ug kun unayon nato kini sa paggun-ob pinaagi sa paghikog, sama ra nga mibiya ta Niya.

Busa, kutob sa kinsay mihimo niiini, usa ray padulngan.