Hapit na gyud

Nag-meeting mi ug ang mga kaubanang lumilihok sa Parokya ni San Pedro Calungsod sa Mohon, Sogod. Cebu. Among gihisgutan ang kalabot sa pagkonsagrar sa among simbahan nga sa tabang sa Dios ug mga tawo nga manggihatagon hapit na gyud tawon mahuman. Gamay raman ning among simbahan apan sa dapit nga sama sa Mohon tingali paigo na kini.

Dili pud ni siya mapuno kaayo matag Domingo gawas lamang kun dunay mga mahinungdanong mga okasyon.

Apan bisan pa man niini angay gihapon nga magpasalamat. Wala tuyoa nga nanumbalik ang kagahapon. Mga tulo ka tuig kapin ako nadagsa dinhing dapita. Malisud kaayo kadto nasuway ang pailob.

Apan sa laing bahin ang maong mga katuigan kasinatian usab sa grasya kay akong nasuta nga ang Dios wala gyud diay magpasagad. Sa akong bahin akong nakita ang akong kaubos ug daw sa nahanaw ang pagsalig sa kaugalingong katakus. Kay unsay makuha kun kita magsalig sa kaugalingon sa kapasikaran nga kitang tanan lumalabay lamang. Wala kitay madala bisan diyot sa atong lubnganan.

Ang panahon diha sa iyang pagligid dunay lama nga nahabilin. Tinuod dunay daghang mga gabii nga nahimong idlas ang katulogon ug bisan gani ang pag-ampo nahimo mang kalbaryo. Apan ning maong kasinatian sa kwaresma sa pagtuo nahimong nihamtong ako sa kinabuhi.

Dili tanang butang imong mahimo ug dunay daghang mga higayon sa kapakyasan. Bisan gani ang kapaspas nahimong balighot sa gitawag nilang kalampusan. Ang tanan mosibo ra gyud sa panahon apil na pud niini ang ambisyon nga mahimong mahanaw daw bula inig abot sa mas ambisyoso pa kay kanimo.

Gisud-ong ko ang mga hulagway sa akong kagahapon ug nakita ko na ang kalainan. Ako kining kalipay nga nagpabiling lig-on taliwala sa mga pagsulay. Tinuod gyud diay nga ang Dios nakasabot ug tingali buot lamang niyang ipakita nga ning tanang paningkamot siya maoy ulo ug tinubdan sa tanang kaayohan.

Sa hinayhinay akong gihipos ang akong mga butang nga giisip kong magamit sa akong sunod nga panaw. Dunay mga butang nga ibilin dili tungod kay wa sila kinahanglana. Gibilin sila tungod kay sila gikinahanglan sa dapit diin sila angayan nga ibutang. Ibilin sila agig timaan sa dakong pasalamat sa kahitas-an nga nipaambit nila ngari kanako.

Ang mga lumulupyo mahabilin tungod gitagik nga ning maong yuta sila mamunga. Wala pa nako Makita ang hinog nga mga bunga apan nakita ko nga nibidlisiw ang banag-banag sa kabuntagon sa malaumong tikdol sa panaw sa pagtuo. Ang bugtong kanunay ning kalibutan mao man gyud ang kausaban. Hapit na gyud ang pagbiya apan pabiling buhi sa gihapon ang mga handumanan nga nahimugso diha sa matag kasinatian maayo man o dautan.