Palig-onon ang aktibismo

Gireklamo napud ang pagtaas sa matrikula sa mga tunghaan lukop nasud. Ang reklamo nakabase sa proseso sa paghatag og pagtugot sa Commission on Higher Education (CHED) sa umento sa matrikula nga walay pagkonsulta sa mga tinun-an.

Base sa balaud, ang tunghaan tugotan lamang nga makapaumento sa matrikula kun gikonsulta niini ang mga tinun-an pinaagi sa ilang Student Body.

Ang reklamo sa umento sa matrikula walay katapusan. Kanunay gyud ni samtang anaa pay mga magtungha sa mga tunghaan. Ang labing apektado sa umento sa matrikula mao ang mga tinun-an sa mga pribadong tunghaan.

Ang mga pribadong tunghaan gitugotan nga makapaumento sa ilang matrikula human sa konsultasyon sa mga tinun-an ug mga ginikanan aron pud sila makalahutay sa ilang operasyon. Apan aron masiguro nga ang umento sa matrikula mapunta gayod sa angayan niining dapatan, ang balaud mao gayod ang mibahig niini.

Sigun sa balaud, 70 porsiyento sa umento sa matrikula mao ang gamiton sa paghatag og umento sa mga magtutudlo ug uban nga kawani sa tunghaan, 20 porsiyento niini ang gastoon alang sa pagpalambo sa tunghaan sama sa pagtukod og dugang edipisyo ug pagpamalit og kagamitan o pasilidad ug ang 10 porsiyento mao ang para sa return of investment.

Apan kun gibahig man sa balaud ang umento sa matrikula, ang miscellaneous nga mga bayranan wala. Resulta - nagpatuyang na lamang sa pagmugna og mga miscellaneous nga bayranan ang mga tunghaan nga hasta ang “among others” pabayran.

Maayo na lang gani kay wala ipaapil sa pagpabayad ang “etc”. Duna pud mga tunghaan nga ang mga tinun-an gipabayad og aircondition bisan walay aircon ang ilang classroom. Pipila lang ni sa mga binuang nga gihimo sa mga tunghaan nga angayan nga tan-awon sa Commission on Higher Education (CHED). Apan unsaon man pagtan-aw niini sa CHED kun walay magreklamo.

Dinhi akong giawhag ang mga tinun-an sa pagpalig-on sa ilang aktibismo.