Unta gugma mopatigbabaw

Panahon sa kampanya, gidili ang pagpatakag papilit sa mga election posters.

Adunay mga dapit nga gigahin alang niini. Ug gituman ba kini sa mga magpapili?

Sa mga aseras sa downtown, dihang mipaingon kong mosimba sa Basilica Minore del Santo Niño, dinhay pipila ka mapahiyomong hitsura sa mga kandidato nga gipapilit sa daw manguhit nga poste kutob sa mga tawong moagi didtong dapita.

May nakasulat pa: ‘Number __.  Ay’g kalimti, ha?’

Sa adlaw sa piniliay, ang mga dagkong punoan sa mangga sa eskuylahan sa Guadalupe sa dakbayan sa Sugbo, namungingi sa daghang bungang nangumbitay. Apan dili sa mangga nga prutas.

Kondili, sa mga election flyers ug tarpaulins.

Sa ubos, sayo pa gani sa buntag, may mga nangapulak nang sample ballots, mga putos sa baligyang pagkaon ug uban pang matang sa sagbot nga nangapasad sa agianang sidewalk ug dapit paingon sa tagsatagsa ka presinto nga gidumog sa nag-abot-abot nga mamotaray.

May mga anino nga kugihang mitunol og sample ballots ngadto sa mga bumubotohay’ng molabay.

Adunay sample ballots nga ang ngalan sa ipapiling mayor. Sa ato pa, patas ang laban.

Pareha ang tapad. Kay unsay gibuhat sa usa, gihimo sab sa kaatbang.

Tuod man, tapos sa iniphanay sa balota, si Ed Labella ang midaog.

May nalipay. Naa poy nayayay. Pero, angay ibutang sa atong kasingkasing.

Nga ang eleksiyon sama sa usa ka sugal. May modaog. May mapilde.

Ang nakadaot lang, kay hugaw ang eleksiyon sa Pilipinas.

Hinungdan, nga ang hunahuna sa katawhan ianod gyod sa naglugitom nga sulog sa pagduda.

Ang piniliay human na. Giproklamar na sa Comelec ang midaog.

Tangtangon na nato ang tanang matang sa hugaw nga atong gipapilit sa mga dughan panahon sa pagpangampanya aron mahibalik ang katahom sa kanhi naandan tang relasiyon.

Tahuron nato ang tingog sa bag-ong napiling mayor diha sa iyang pagdala sa renda sa City Hall.

Ug unta magkahiusa tanang kasaligang konsehal, regardless diin sila partidoha gikan, nga suportohan ang mga proyektong ilusad sa bag-ong mayor.

Labi nag ang maong proyekto makapabulahan sa atong siyudad ug katawhan.

Unta, panahon sa nagpangidlat nga kainit sa argumento diha sa konseho, gugma ang mopatigbabaw.