EDITORYAL - Kooperasyon sa LGUs

Dako kaayo ang kahigayonan nga may dakong kausabang mahitabo sa pagdumala sa Sugbo sa mosunod nga tulo ka tuig. Kini kun tinud-on sa mga bag-ong napiling mga opisyal ang ilang gipangsulti nga “maghiusa” sila alang sa kalamboan sa tibuok Sugbu.

Ang mga LGUs sa Sugbo dunay kumon nga mga problemang giatubang karon nga wala gyud masulbad tungod sa pag-iyahay sa mga naglingkod nga mga lider.

Gikan sa basura, supply sa tubig, kriminalidad, panglawas, pagkaon, kuryente ug kaning adlaw-adlaw nga problema sa traffic.  Apan ang problema sa basura, tubig ug traffic maoy gisaw-ang sa mga siyudad nga sakop sa Metro Cebu. May nahunahunaan si Cebu governor-elect Gwendolyn Garcia nga solusyon sa problema sa tubig, pinaagi sa pagkuha og supply niini gikan sa mga kasapaan ug waterfalls sa habagatang bahin sa probinsya.

Kaning iyang sugyot maayo kini nga dinaliang solusyon, apan dili kini malungtaron kun dili dunganan og lapad nga kampanya pagpananom og mga kahoy sa kabukiran. Dili lang unta kutob pagkuha lang ang naa sa hunahuna sa gobernador kondili apilon sab unta sa ilang plano ang pagpananom og mga kahoy aron masigurong ang tinubdan sa ilang tubig dili mahubas.

Pinaagi sab niini dili maapektuhan ang supply sa tubig sa mga lugar diin kuhaon ang tubig nga i-supply sa Metro Cebu. Sa problema sa basura, walay laing labing maayong pamaagi paghipos ug pagdispatsar niini kondili ang pagbaton gyud og Material Recovery Facility.

Kun dili kaya sa mga gagmay nga mga LGUs, mas maayong maghimo niini og usa matag distrito aron didto tanan dad-on ang basura.  Sa problema sa trapiko, masulbad kini kun ang tanang mga mayor mokooperar pinaagi sa pag-usa sa ilang mga local traffic ordinances. Kinahanglang dunay koordinasyon ang matag traffic enforcement units sa tanan LGUs ug may tukorong usa lamang ka traffic authority nga maoy modumala sa tanan. Dili molambo kondili mokamang gyud ang tibuok Sugbo kun maghinakog ang matag mayor sa mga LGUs. Ang gihimong solidarity meeting sa mga bag-ong nakadaog nga mga opisyales dili lamang unta kutob didto.