Buhi o Patay?

Mitumaw ang katahap kun ang self-confessed drug lord nga si Franz Sabalones ba gyud ang napatay didto sa kaulohan niadtong nakalabayng mga buwan.

Kini human migawas ang resulta sa finger print matching sa lawas ug sa record nga nakuha sa kapolisan gikan sa COMELEC sa lungsod sa San Fernando.

Wala magtakdo ang finger print ni Sabalones sa COMELEC record hinungdan nga dili malikayan ang mga pagduda.

Sumala ni Police Brigadier General Debold Sinas nga duha lang ang posibleng mahitabo, nga buhi pa si Franz o dili si Franz ang naka fill up ug naka thumbmark sa record sa Comelec.

Giklaro hinoon sa kadagkoan sa PNP nga ang resulta sa finger print matching dili igo nga basehan nga maka conclude nga buhi pa ang self-confessed drug lord sa Sugbo.

Naa pay laing proseso ug mas accurate pa ang resulta nga mao ang DNA matching apan ang problema sa mga otoridad kay dili naman igkita ang immediate family ni Franz.

Bitaw no? asa naman diay ang iyang inahan ug mga igsoon? bisan unsa seguro ka dautan sa anak dili mahimong talikdan ilabi na sa inahan.

Pero ni usa ka pamilya wala gyud mopatim-aw aron kuhaon ug hatagan og desenteng lubong  ang namatay nga mahal sa kinabuhi.

Sa nagbanig pa sa kwarta si Franz, lakip sa nabuhong ang iyang mga kadugo apan karon wala na siya bali-baliha.

Basin nahadlok nga mopkita sa kapolisan ang immediate family, apan dili man pud siguro sila iapil sa pagsikop sa mga otoridad kay igo ra man silang mo claim.

Apan wala sila magpatim-aw tungod sa katarongan nga sila ra ang nasayod.

Sumala ni General Sinas nga kun dili ma claim ang lawas nga gitoohang iya ni Franz ilubong na kini isip pagtamod sa lagda.

Buhi man o patay na gyud si Franz Sabalones, padayon gihapon ang grupo niini sa pagpakuyanap sa illegal nga drugas.

Kini ang dakong hagit sa kapolisan ug sa ubang mga law enforcement agency kon unsaon nila sa pagpakgang sa problema.

Bisan pa man sa kahigpit nga kampanya batok sa illegal drugs,  nagpadayon gihapon ug dinagko na gani ang masakmit sa mga otoridad diin minilyon ang kantidad.

Samtang duna pay mogamit, dili gyud mawagtang ang mga tig supply sa illegal drugs.

Dili lang sa kapolisan kon dili sa tibook katilingban nakadepende ang kalamposan batok sa illegal drugs.