Gikinahanglan ang pirmadong deed of donation sa owner

Dear Atty. Divine:

Ang akong papa tenant sa usa ka yuta. Pagkamatay niya gitanyagan mi og kwarta sa tag-iya kay papahawaon mi ug ang iyang kwarta nga ihatag namo bugti sa mga natanom sa among amahan sa ilang yuta.

Apan wa mi modawat sa kwarta ug ang among gipangayo portion lang sa yuta nga among  katukuran og balay so misugot ang tag-iya og gisukdan dayon mi og 300 square meters.

Human niini, gibaligya sa tag-iya ang yuta ug lain na ang tag-iya niini apan wa mi mahatagi og Deed of Donation sa nagdonar sa yuta kay milarga man dayon sa gawas ang tag-iya pagkahalin sa yuta. Akong gisuwayan og duol ang bag-ong tag-iya apan miingon man siya nga dili daw mi mabalaka kay way labot sa iyang gipalit ang portion nga among gi-occupy .

Ang akong pangutana kinsa man gyud dapat ang mopirma sa Deed of Donation? Pwede ba ang ikaduhang tag-iya ang papirmahon? Mamahimo ba nga kami ang magpabuhat sa Deed of Donation ug igo nalang siya mopirma? Daghang salamat.—Jessa

Dear Jessa,

Basi sa atong balaod, kun idonar ang real property sama sa yuta kinahanglan nga kini in writing gyud ug adunay acceptance sa  gihatagan ug dapat notarized gyud aron kini mamahimong valid. Sa imo nga kaso way Deed of Donation nga gipirmahan ang tag-iya so dili valid ang maong pagdonar. Ang unang  landowner mao gyud dapat ang mo-execute sa Deed of Donation. Ang maayo nimong  buhaton karon mao ang  pagsusi sa tax declaration or title sa property kun giapil ba sa pagbaligya ang 300 square meters nga inyong gipuy-an. Kun wa  gani giapil then ang original owner gyud ang dapat mopirma kay nakapangan pa man kini kaniya  apan kun naapil gani sa pag-transfer  sa nakapalit  ang portion nga inyong gipuy-an, mamahimo kang mohangyo sa second owner sa pagpirma sa Deed of Donation sa inyong gipuy-an kay nakapangan na man kini kaniya. Mamahimo ra nga magpahimo ka og Deed of Donation sa imong abogado aron igo nalang unya siyang mopirma. Thanks and God bless.—Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.