Politika sa tubig
ARANGKADA - Leo Lastimosa (Banat) - May 25, 2019 - 12:00am

Dihang nagsugod na og tidlom ang suplay sa tubig sa Dakbayan sa Sugbo ug kasilinganang mga dapit tungod sa El Niño, nipahibawo si Chairman Joel Mari Yu sa Metro Cebu Water District (MCWD) nga maibanan kun di man hingpit nga masulbad ang problema kun matukod na ang Mananga dam nga motigom og 100,000 ka cubic meters nga tubig gikan sa suba sa Mananga matag adlaw.

Niangkon si Yu nga ang pagkahinayon sa proyekto mag-agad sa sangpotanan sa piniliay.

Nga karon ato nang nahibaw-an nga niilis sa liderato sa dakbayan ug lalawigan.

* * *

Ang pagpabarug sa dam gisugyot na niadtong 1951 ni anhing Serging Osmeña, amahan ni Cebu City Mayor Tommy Osmeña.

Apan wa mapatuman bisan gisubli sa nisunod nga katuigan tungod sa balibad sa nasudnong gobiyerno: Way kuwarta alang sa higanteng proyekto.

Apan nagtuo si Yu nga malutsan na nila ang babag kay daghang pribadong kompaniya ang nipadayag og interes sa paggasto sa ilang kaugalingong pundo bugti sa katungod sa pag-operate sa dam.

Ipatuman ba sa bag-ong mga tagduma sa City Hall ug Kapitolyo ang plano sa MCWD?

* * *

Dunay duha ka nahibiling babag sa proyekto:

• Madoble ang bayranan sa tubig sa MCWD gikan sa P29 matag cubic meter (nga segun ni Yu maoy kinabaratohan sa tibuok nasud) ngadto sa P60 matag cubic meter (sama sa bayranan sa mga konsumidor sa tubig sa Metro Manila); ug

• Ang panginahanglan sa pagbalhin sa kapin sa 1,000 ka pamilya nga nagpuyo duol sa suba sa Mananga sa tulo ka barangay sa Cebu City ug Talisay City.

* * *

Silang Yu ug ubang mga sakop sa MCWD board pulos tinudlo ni Mayor Osmeña. Busa seguro nang mapulihan sa mga tinudlo ni Mayor-elect Edgar Labella.

Makabalik ba ang karaang mga tagduma nga tinudlo ni kanhi mayor ug karon Vice Mayor-elect Mike Rama o bag-ong board members ang tahasan ni Labella pagsulbad sa krisis sa tubig?

Gitambagan ni Rama si Labella sa di pagpa-apil sa taga gawas sa ilang pagduma sa City Hall, nga maglakip sa MCWD.

Mahimong makadugang sa komplikasyon ang posibleng pagbanhaw sa Kapitolyo sa baruganan nga sila nay angayng motudlo sa mga tagduma sa MCWD.

* * *

leo_lastimosa@abs-cbn.com

POLITIKA
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with