Hulga sa tinguwan ug bagyo
Bisan sa nagpadayon nga El Niño nga may kahigayonan nga molungtad hangtod sa kataposan ning tuiga, mahinayon ang pag-abot sa tinguwan bisan unsang higayona sa mosunod nga tulo ka semana. Ang hapit matag adlaw na nga pat-ak pat-ak nga pag-uwan sa Sugbo ug Central Visayas kabahin na sa inanay nga pagbanos sa Habagat nga maoy magda sa uwan.
Gipahibawo sa kadagkoan sa Philippine Atmospheric, Geophysical and Astronomical Services Administration (PAGASA) nga ang El Niño di makapalangay sa tinguwan karong tuiga. Sama sa niaging tuig nga ang tinguwan nagsugod sa Hunyo 8.
* * *
Ambot nagsalig ba kaha nga dugay pang mahuman ang ting-init, o gitakboyan sa taas nga hilanat sa niaging piniliay, o sama sa naandan nagpabaya lang gyod sa katungdanan, ang lokal nga mga opisyal ug nasudnong mga buhatan sa gobyerno di pa andam sa tinguwan.
Bisan katag ug kadiyot pa ang uwan sa nangaging mga adlaw, nagbaha na ang pipila ka bahin sa Metro Cebu.
Hinaot nga wa magpaabot sa pagbunok sa mas kusog nga uwan una magkara-kara sa paghawan ug pagpangita og mga kalutsan sa bugwak sa mga imburnal.
* * *
Gibutyag sa PAGASA nga nidako ang kahigayonan (niabot na og 70%) ang kahigayonan nga ang El Niño, nga gitakda untang matapos na karong buwana, mainat hangtod sa Agosto ning tuiga.
May gamay gani nga kahigayonan nga maabtan hangtod sa Disyembre ning tuiga.
Apan daghang salamat sa pag-abot sa tinguwan sa tukmang higayon, makasugod na og pananom ang mga mag-uuma sa sunod buwan.
Hinaot ma-apud-apod na sa Department of Agriculture (DA) ang mas maayong mga binhi karong buwana.
* * *
May dugang nga pasidaan ang PAGASA sa mga implikasyon sa mas taas nga lahutay sa El Niño ngadto sa mga bagyo karong tuiga:
• Mas gamay ang uwan apan mas kusog ang hangin sa umaabot nga mga bagyo, kay makadugang sa buylo sa hangin ang mas init nga temperatura sa Pacific Ocean, ug busa mas dagko ug mas lapad ang kadaot nga mamugna sa mga dapit nga maagian; ug
• Human sa tulo ka bagyo sayo ning tuiga, gipaabot nga pito ngadto sa 14 pa ka bagyo ang mosunod, mas ubos kay sa naandan nga 20 ka bagyo matag tuig.
* * *
- Latest
