Bag-ong sistema sa pag submit sa SOCE

Human na ang eleksyon, naay nakadaug naa usay napilde, silang tanan gikinahanglan nga mosumiter sa ilang Statement of Contributions and Expenditures (SOCE) hangtod sa Hunyo 12. Ang tanang mga milansad nasayod na unsa ang sangpotanan o mahitabo kon mapakyas sa pagtuman sa lagda sa eleksyon nga aduna gyuy tukmang silot.

Pahimangno sa mga moduso sa SOCE nga dili pareho kaniadto nga pwede ra moderetso sa mga election offices ug didto na mo-fill up sa SOCE form.

Apan karon gikinahanglan nga i-encode sa computer ang mga impormasyon pinaagi sa form nga ma-download sa COMELEC website. Human ma-fill up ang form ayha pa i-print aron mapirmahan ug dad-on personal sa kandidato sa buhatan sa COMELEC. Mas maayo seguro magpangutana daan ang mga kandidato o motawag sa buhatan sa COMELEC aron maseguro nga dili malangan o mahasol sa sestema nga gipatuman karon.

Kadtong mga langay langayan o last minute na mo-submit sa ilang SOCE nga dili masayod sa sestema posibleng maabtan gyud sa cut off time ug dili na hinoon ma-submit ang gikinahanglan. Dili nalang seguro maghulat sa deadline kay kon mataligam-an aw segurado gyud nga ma dead ang SOCE submission. Tiwason nalang gyud ang proseso kay gisugdan naman pinaagi sa pag apil apil sa politika, ngano bitawng ni enter. Samtang kumusta naman kaha pud ang mga kandidato kaniadto nga tataw kaayong nakalapas sa lagda pagpamutang sa mga propaganda materials?

Naa kahay masampolan sa pagpasaka og kaso? Dili nalang ta magdahum kay gustohon sa COMELEC nga gukdon ang mga malapason kutob ra gyud sila sa pulong.

Una daghan kaayo silag giatiman o atimanon pa ug limitado ra usab kaayo ang ilang manpower maong dili gyud maato tanan sa COMELEC. Karon kay human naman ang tanan, panahon na usab nga mo move on na ang tanan, mga kandidato man o mga supporters, dawaton ang gidangatan sa kapalaran unsaon man nga duha ra man gyud ang kapilian, kaparotan ug kadaugan.