Bag-ong mayor, bag-ong pag-asa
LABTIK - Alan Domingo (Banat) - May 24, 2019 - 12:00am

Wala pa gani makaasumir paglingkod sa iyang trono sa Cebu City Hall, ang bag-ong napiling si mayor-elect Vice Mayor Edgardo Labella nagsige nag hunahuna unsay angay niyang trabahoon pag-una aron ikapakita sa katawhan nga wala sila masayop pagpili kaniya sa miaging makutas ug daw gi-El Niño’ng piniliay.

Ug kinsa bay dili panington sa presensiya sa mga kapolisan nga gipakatap didto sa mga kabukiran ning siyudad, diin bana sa among helper giteksan sa iyang Mama nga dili na lang pabotaron didto sa ilang bukid kay nagbahis ang pulos armadong nakauniporme.

Hinungdan, nga mi-us-os gyod og pipila ka porsiyento ang gidaghanon sa mga botanteng mipahungaw-tamla sa ilang katungod didto sulod sa alimuot nga voting centers.

Gani, dinhay namatay human makabotar sa gipiling mayor kay gi-heat stroke.

Puwerting lipaya sa mga dumadapig ni Labella dihang ang ilang pagpaningkamot sa hilom nga pagpangampanya, maoy mituboy ni Ed paingon sa usa ka makabungog nga kadaogan.

Pamilya sa akong higala, aw, posing dayon tupad sa bag-ong napiling mayor. Ug ambot, hasta kapila sila hagkihagki sa nagpangidlap nga kamera sa ilang selpon ug i-phone.

Hinuon, sa pamayhon ni Ed, matataw nga wala sa iyang kinaiya ang kamadinumtanon. Sa lapyahan sa Facebook, kadtong pagdebate nilang Tommy atubangan sa mitambong nga mga estudyante, mipabuhagay man siya og pasalig nga ingkasog suwertihon, ug siya maoy makadaog sa pagka mayor, andam gihapon siyang makig-uban ni Tommy diha sa pagpangalagad sa katawhan.

Pagkanindot nga taras. Taras nga nagtanyag og panaghiusa aron kadtong taytayan sa magkaatbang lig-ong haligi nga nangaguba panahon sa kampanya, ayohon aron magkadugtong pag-usab ang nagkalay-anay’ng mga kasingkasing.

Tingale, mao kini hinungdan, nganong si Labella miarangkada dayon. Giladlad niya ang mga nindot nga plano nga sarang makahatag og kabag-ohan sa siyudad.

Pagpahiuli sa maayong relasiyon sa City Hall ug kapolisan, mao kunoy una niyang tutokan. Nagplano sab siya nga wad-on na ang Barangay Mayor’s Office sa kabarangayan. Unya, patas-an sab ang financial assistance sa mga senior citizens.

Ning pagladlad atubangan sa publiko ni Ed sa mga importanteng gimbuhaton sa iya unyang paglingkod sa City Hall, daw kalit lang misilang ang buntagong adlaw didto sa kasadpan dungan ang pag-awit sa kalanggaman nga nagkanayon: “Bag-ong mayor, bag-ong pag-asa!”

PAG-ASA
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with