Natabonan sa popularidad
ARANGKADA - Leo Lastimosa (Banat) - May 21, 2019 - 12:00am

Nisuway apan napakyas ang oposisyon sa pagkumbinser sa mga botante sa pagsalikway sa mga giduso ni Presidente Rodrigo Duterte sa Senado sa niaging piniliay nga maoy nipasar sa iyang Tax Reform for Acceleration and Inclusion (TRAIN). Kay maoy hinungdan sa pagsaka sa presyo sa lana ug sa inadlaw nga mga panginahanglan.

Tingali natabonan lang sa talagsaong popularidad sa presidente.

O tingali mas epektibo lang siya nga nipasabot sa mga botante nga ang dugang buhis maoy gigasto sa libreng matrikula sa mga kolehiyo sa gobyerno ug libreng bayranan sa mga ospital.

* * *

Karong buntag mapahinumdoman na sab ang mga konsumidor sa sayop nga probisyon sa TRAIN Law nga gipamugos sa economic managers sa presidente:

Dugang buhis sa mga produkto sa lana sugod sa 2018 hangtod sa sunod tuig 2020.

Kay dako na sab ang usbaw sa presyo sa lana sugod alas-6 karong buntag.

Bug-at nang daan ang pagsige og saka sa presyo sa merkado sa kalibotan, nga di masagang sa atong gobiyerno, apan mas lisod pas-anon tungod sa patong nga P6 matag litro, nga mahimo ra gyod untang bakwion sa gobyerno.

* * *

Kun wa kang kapatubil hangtod gabii, maapil ka nga magsagunto sa uminto sa mosunod nga mga produkto: 90 sentabos matag litro sa gasolina; 80 sentabos matag litro sa krudo; ug 75 sentabos matag litro sa kerosene.

Direktang epekto sa pagmahal sa lana ang pag-usbaw sa plitehan sa mga sakyanang pamasahero. Apan ang mas sakit nga igo mao ang mas dako nga pagsulbong sa presyo sa inadlaw nga mga palaliton kay naggamit og lana ang produksiyon sa mga produkto ug ang naandan nga dugang patong sa mapahimuslanon nga mga negosyante.

* * *

Usa sa gitumbok sa mga eksperto nga yawe sa nagpadayong popularidad sa presidente mao ang iyang katakos pagpanghunaw og responsibilidad sa di maayong mga panghitabo, bisan kon siya ang responsable, ug ang pag-angkon og kredito sa maayong mga panghitabo, bisan kon wa siyay labot.

Tinuod nga way labot si Duterte sa hulga sa gubat sa Iran ug Estados Unidos sa Persian Gulf. Apan makahimo ang makabungog niyang mayoriya sa Kongreso sa pagbasura sa mga probisyon sa gipanday nilang TRAIN Law nga nakapasamot sa atong kalisod.

* * *

leo_lastimosa@abs-cbn.com

TAX REFORM FOR ACCELERATION AND INCLUSION
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with