Katungod nga mapalit
Usa sa labing nakapahugno nako sa niaging piniliay mao ang kasayuran nga bisan ang mga politiko nga nangapilde namalit sab og boto. Natino sab nako nga ang mga nanagan nga akong gituohan nga ligdong ug masinugtanon sa balaod way kalainan sa mas gikaintapan nilang mga kaatbang kay niapil sab og pamalit og boto.
Ang bugtong kalainan mao nga ang mga nidaog mas dagko og palit. Bisan ang pipila ka politiko nga gipasidunggan nga nakapatumba og politikanhong dinastiya nakadaog diay kay nakaandam og mas dakong puntil kay sa mga nagtungkawo sa gahom.
* * *
Apil sa akong nahibaw-an gikan sa daghan uyamot nga tinubdan nga labing menos duha ka nagpapili pagka gobernador dinhi sa Kabisay-an nangapilde bisan namayad sila og P100 matag botante. Ang hinungdan? Ang nidaog nilang mga kaatbang namayad og P200 matag botante.
Mao ba ni hinungdan nga di gyud mapahamtang ang mga lagda batok sa vote buying kay pulos sad-an ang mga nidaog ug mga napilde? Mao ba sab ni hinungdan nga di managana ang mga botante sa pagdawat sa kuwarta kay nahibawo nga nangurakot nila ang kasagaran sa nanagan?
* * *
Laing makapahasol: May mga botante nga nagtuo nga ilang katungod nga mapalit; may pipila gani nga niisip nga nagbudhi ang ilang gipaluyohan nga mas gamay og bayad kay sa kaatbang.
Nitug-an nakong drayber sa habal-habal nga job order sa usa ka dakbayan sa Metro Cebu nga dapig unta siya sa incumbent kay maoy naghatag sa trabaho. Apan P100 ray bayad sa mayor, samtang P500 ang bayad sa pikas. Nisunod sa panon sa iyang mga silingan, nidawat siya sa duha. Ug nibotar siya sa pikas bahala na kun mataktak sa trabaho human sa piniliay.
* **
Sa mga dapit nga di kaayo daghan ang mga botante, niabot ang palit hangtod sa P1,500 matag botante. Mao ba ni hinungdan nga bisan kinsay makatungtong sa katungdanan maningil og komisyon sa mga proyekto aron mabawi ang dakong gasto ug makapanukad nang daan alang sa sunod nga piniliay?
Natino sab nako nga nanghilabot ang mga polis sa piniliay sa pipila ka dapit: Gibaraw nila ang vote buying sa pikas apan gilingiwan ang mas grabeng pinalitay sa gidapigan sa ilang mga labaw.
* * *
- Latest
