Seniors misayo,dugay nakabotar
Early bird catches worm.
Busa, kaadlawon pa lang sa May 13 Election Day, nangmata na ming misis ug nangaligo.
Wala pay alas 6:00 sa buntag mibiyahe na mi paingon sa presinto nga giandam para sa mga PWD ug Senior Citizens.
Nakurat mi kay alas 6:00 pa lang sa buntag aduna nay pipila nga nauna namo.
Sa gawas, may mga botante pong pulos nagsakay’g wheel chair, nagpaabot kanus-a pasudla.
Kaanugon sa among pagpaningkamot nga masayo. Kay abi namog “early bird catches worm”, wa man gihapon mi kakaog wati, uy! Unsay among nakaon? Konsimisyon!
Tiaw bay, ang mga in-charge sa Emergency Accessible Polling Place, Cluster 47, diin naa among ngalan ni misis, nagkarakara intawon unsay angay buhaton kay wala diay kuno sila i-briefing sa Comelec sa tukmang proseso nga makapatulin sa ilang serbisyo.
Abi nakog pag-abot namo, human makompirmar among ngalan sa ilang listahan, tagaan dayon mig balota.
Pastilan, kami man hinuoy gipangayoag ID. Unya, gipapirma pa’g authorization/waiver.
Authorization nga tugotan ang election poll in-charge nga maoy mokuha sa balota namong senior o PWD nga atua pa diay magluklok sa orihinal namong presinto.
Ang pait, kay layolayo ang distansiya sa nahimutangan asa kini kuhaa. Busa, mokunsumo gyud og ubay-ubayng minutos ang pagpaabot.
Ug waiver, kay diay, dili ang botanteng seniors ang mopakaon sa balota nga gikargahan sa mga kandidatong ilang gibotaran ngadto sa Vote Counting Machine (VCM) kun dili ang Electoral Board nay mopahigayon niini.
Ang makapahibulong kay hasta ang pag-inspeksiyon sa voting receipt, gipa-waive sab sa maong dokumentong gipapirmahan. Grabehang kondisyona. Makaduda!
Dili ta ko mopirma. Pero kon dili ko mo-sign, di man sab ko tagaag balota.
Nakadesider unta ko nga adto na lang unta mobotar sa orihinal kong presinto. Wala na pud didto akong ngalan. Kay gibalhin na sa Cluster 47. Ano ba yan?
Basta natapos mig botar ni misis alas 8:30 na sa buntag. May’pa among anak nga didto molinya sa regular lane precinct kay mas una pang nahuman. Mao ba ning gipasiatab sa Comelec nga hatagan nilag prayoridad ang mga seniors, pregnant women ug PWD aron dali makabotar?
Mao ba kini ang matuod nga kahulogan sa Emergency Accessible Polling Place?
- Latest