Counseling Tips alang sa mga may Suicidal Potentialities

Kini naglangkob ning mosunod:

1.  Ang pag-establish og suod nga relasyon tali sa counselor ug sa kliyente. Kini naglangkob sa assurance of confidentiality, pagtahud, ug pagpakabana sa kahimtang sa hingtungdan. Mahinungdanon kaayo nga himoong comfortable ang hingtungdan nga mopadayag sa iyang kaugalingon ngadto sa iyang counselor.

2. Dunay mga higayon nga ang counselor dili dayon makapangutana sa kliyente og lahus sa iyang plano nga magpakamatay sa kahadlok nga ang maong pangutana magsilbi nga  sugyot sa hingtungdan. Apan kinahanglan nga sultihan gyud ug atubangon kining maong isyu labina kun kini dayag na kayo. Dili maayo nga magpaabot ang counselor nga mamahimong mas grabe pa ang sitwasyon una pa himoon ang intervention.

3.  Ang paghimo og hinanaling lakang kuyog sa pamilya ug sa mga ahensiya apil na ang religious sector dako kaayo og kahimoan aron mabuligan ang dunay laraw nga maghikog nga magiyahan.

Mahinungdanon kaayo karon ang paghupot og kasingkasing sa usa ka maayong magbalantay alang sa kinabuhi sa usa’g- usa.  Ang tinuod nga magbalantay tawo nga isog ug andam manalipod sa kinabuhi mao nga ang pamilya ingon man ang counselor kinahanglang maghupot ning maong hiyas diha sa pagpakgang sa bisan unsang negativity nga anaa sa biktima. Kinahanglan nga positibo ug kadasig ang mohari sa iyang hunahuna ug pagbati.

Ang tinuod nga magbalantay andam ug tagana nga magpailob labina sa mga luyahon. Ang paghunahuna og hikog usa ka luyahong lakang sa paglingkawas sa problema sa kinabuhi. Mao nga angayan nato kining sabton ug hatagan og igong panahon aron siya magiyahan nga ang paghikog diay dili sulbad sa problema.

Dugang pa dugay kaayo ang proseso sa disclosure mao nga ang counselor kinahanglan nga magpaabot gayud ug kun sa iyang panlantaw o evaluation mao gyud ang padulngan sa hinay nga paagi iyang sultihan ug maymayan ang hingtungdan.

Ang tinuod nga magbalantay nakaila sa iyang karnero. Aron dili ka hisaypan o dili ka magpasagad og hatag sa imong tambag mahinungdanon kaayo ang pag-ila sa biktima sa kinasingkasing gayud. Kay kun nahimo kang usa ka sa iyang kinabuhi imong masabtan ang iyang kahimtang. Ug labaw sa tanan pag-ampo nga buligan ka sa imong tinguha nga maluwas ang tawo gikan sa kaalautan kay walay dili mahimo kun tabangan lang sa grasya sa Dios.