Black propaganda versus track record

Usa ka semana nalang kapin ang nahabilin sa kampanya sa dili pa adlaw sa piniliay. Sulod sa nanlabay’ng mga adlaw sa kampanya nasaksihan sa publiko ang nagkadaiyang bulatik sa mga kandidato aron pagdani sa mga botante.

Lainlain ang paagi nga gigamit sa mga pilionon aron makabintaha sa ilang kaatbang.

Ang uban midangop sa gitawag og “black propaganda” kon pagpanaot sa ilang kontra samtang ang uban nagpabiling desente nga mikampanya gamit ang ilang “track record.” Sa tinuoray lang wala kinahanglana sa usa ka kandidato ang pagdangop sa “black propaganda” aron dauton ang iyang kontra kun duna siyay ikapanghambog. Ang desente nga kandidato modaug basi sa iyang plataporma ug mga maayong nahimo sama sa mga proyekto ug mga programa nga mahinumduman sa mga botante sa higayon nga mosulod na sila sa ilang tagsa-tagsa ka mga prisinto karong Mayo 13.

Ang kandidato nga modangop sa pagpanaut sa iyang kaatbang nagpakita sa iyang ka desperado ug kakuwang sa mga programa ug kalampusan nga sarang niyang ikapanghambog.

Sa akong tan-aw mas mosalir sa publiko ang desente nga paagi sa kampanya inay nga manaot sa kontra.

Ehemplo niini ang kampanya sa mga kandidato  sa probinsiya sa Sugbo. Kun nakamatikod mo, taliwa sa grabing mga pagdaut batok ni kanhi gobernador Gwen Garcia nagpabilin siyang popular didto sa kalungsoran.

Ug basi sa mga hulagway sa ilang kampanya nga napatik sa mga mantalaan imong matandi kinsa nilang Garcia ug sa iyang kaatbang nga si Bise Gobernador Agnes Magpale ang mainitong gihangop sa publiko. Niadtong miaging semana ang duha ka mga kandidato didto sa isla sa Camotes, usa sa mga dapit sa 5th district nga maisip nga balwarte ni Magpale.

Apan makita nimo sa mga hulagway nga si Garcia gidumog ug gigakos sa mga tawo samtang si Magpale sa pikas bahin nagdiskurso atubangan sa publiko nga ang uban nagkusmod nga daw sa kontra gusto sa ilang pagtambong.

Ug sigun sa mga kasayuran nga akong nadawat, bisan asa nga lungsod moadto si Garcia ingon niini kainit ang paghangop niya sa katawhan.

Nganong taliwa sa kampanya sa iyang mga kaatbang pagdaut niya tungod sa daghang kontrobersiya nga iyang giatubang nagpabilin man siyang popular? Ang rason tungod kay mas nitatak sa publiko ang mga proyekto ni Garcia kaysa mga pasangil batok niya.

Mas nahinumduman  sa katawhan ang mga hinabang nga ilang nadawat panahon ni Garcia sama sa financial assistance sa mga barangay health workers, school supplies sa mga estudyante, hinabang sa mga tanod, pagtukod ug mga karsada, ug uban pa.

Mas importante alang sa mga molupyo sa kalungsoran nga napaayo ni Garcia ang ilang karsada kaysa mga pasangil sa iyang kaatbang. Lain nilang rason mao nga kabahin si Magpale sa mga transaksiyon nga gipasangil batok ni Garcia.

Kun dunay anomaliya ang katukoran sa Cebu International Convention Center ug ang pagpalit sa Balili Property apil si Magpale sa angayang manubag sanglit kabahin siya sa Provincial Board nga mitugot sa maong mga transaksiyon.