Police brutality
AMBOT LANG - Gerry Auxilio (Banat) - April 30, 2019 - 12:00am

Gibulgar sa kapuyo ni Eddie Basillote ang pagpanghulga ni Police Colonel Royina Marzan Garma, director sa kapolisan sa dakbayan sa Sugbo ngadto sa iyang pamilya atol sa gipahigayon nga press conference niadtong miaging adlaw.

Ang pagpanghulga gitumong aron dili dayonon sa pamilya ni Basillote ang pagpasaka og kaso batok sa mga polis sa Talamban Police Station nga gipasanginlan nga nangulata ni Eddie Basillote dihang gidakop kini ug ang lain pang tulo ka kauban niini atol sa gipahigayon nga buy-bust operation sa usa ka computer game shop sa Barangay Carreta.

Ang pagpanghulga gitumong usab aron wagtangon na ang video nga nag-viral tungod sa gipakita niini nga pagkulata sa mga polis ngadto sa ilang mga dinakpan.

Ang pagpanghulga matud pa, gihimo ni Colonel Garma dihang mibisita kini sa selda ni Eddie Basillote. Pero matud pa sa kapuyo ni Eddie Basillote nga lig-on ug pursigido gayod siya sa pagpasaka og kaso batok sa mga polis sa Talamban nga nangulata. Iya usab nga giklaro nga walay politiko nga mitabang kaniya maong nagpatabang siya sa mga sakop sa media.

Apan ang pasangil hugot nga gipanghimakak ni Colonel Royina Marzan Garma. Ang director sa kapolisan sa Dakbayan sa Sugbo miklaro nga dili niya ikompromiso ang kapin 20 ka tuig na niyang pagka polis sa usa lang ka gamay nga kaso.

Ang gihimo sa mga polis sa Talamban dakong sayop ug usa ka pag-abuso sa ilang pagka polis. Over Acting (OA) ra kaayo kini sa ilang pagdakop kang Basillote ug kaubanan. Kun ang video ang atong basihan wala gayud kinahanglana sa mga polis ang pagkulata sa ilang dinakpan tungod kay wala man kini mosukol ug labaw na nga walay armas.

Tungod niini, angayan ug matarong lamang gayud nga sila disiplinahon ug patagmon kay wa ta manginahanglan og abusadong polis.

Sakto ang gihimo ni Garma nga pagrelibo sa walo ka mga polis sa Talamban nga nalambigit sa pagpangulata. Ako usab nga gidayeg si Garma sa iyang pagbilin sa hepe sa Talamban Police Station nga si Elizandro Quijano tungod kay tarong kini nga polis ug relihiyoso. Personal ko nga nakaila niining maong polis.

Dili pod ko motoo nga makahimo sa pagpanghulga si Garma ngadto ni Eddie Basillote ug labing seguro gihimo lang kini sa naulahi aron dauton ang kredibilidad sa mga polis nga maoy kanunay nga himuon sa mga nadakpan nga nalambigit sa gidili nga drugas.

EDDIE BASILLOTE
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with