Diinka maligo sa Semana Santa?

Buotan ang Ginoo. Napuno sa gugma ang Iyang kasingkasing ug tugob sa kamapasayloon.

Kana kun kaantigo kang mangayo’g pasaylo Kaniya sa mga sala nga imong nahimo batok sa Iyang mga sugo.

Kada tuig, gihatagan gyud tang mga Romano Katoliko og taastaas nga bakasyon panahon sa Semana Santa.

Gituyo Niya nga papahulayon sa atong naandang trabaho, aron may igo tang higayon nga moduol ug makig-estorya Niya didto sa nagdupang ganghaan sa simbahan nga hagbay rang nagpaabot sa atong pagbalik human ta mahisalaag pagsubay sa matuod nga dalan sa kinabuhi paingon sa gingharian sa Langit.

Apan diin ka ba mopaingon sa miaging Semana Santa?

Among kauban sa trabaho, 20 sila tanan, Huwebes Santo pa lang, nangaligo nag dagat sa usa ka matahom nga beach resort.

Sadya ilang grupo nga nangaog litsong baboy, lamiang seafoods, nag-selfie-selfie ug nagkantakanta samtang nag-aray og mahalong ilimnon sa ilang atubangan.

Ingon niini ka bibo ang mga beach resorts sa adlaw nga gihugasan sa Ginoo ang mga tiil sa Iyang mga tinun-an aron matangtang ang namilit nga buling sa ilang lapalapa sa dili pa Siya dakpon, kastigoon ug patyon sa mga Hudiyo.

Gipakita ni Hesus dinhi nga bisan Iyang mga tinun-an kanunay’ng nakig-uban diha sa Iyang pagpanudlo sa sinagoga, may dapit gihapon sa ilang pagkatawo nga dili limpyo.

Busa, angay lang hugasan aron mahataga’g kahigayonan nga makaadto sab sila sa lugar nga Iyang adtoan - ang Paraiso.

Ug unsa bay gibuhat ta sa maong adlaw? May guwapang dalaga, kinsa sobra kalimpiyada, naghubo gyud sa tanan niyang hapin ug usa ka oras nga nanglugod pag-ayo sa mga buling sulod sa ilang banyo.

Tapos, nanghaplas pa gyud og lotion sa tibuok kalawasan.

Abi kog moadto sa simbahan. Pastilan, motel man ang gisudlan, uy! Ug nakig-good time sa iyang sugar daddy. 

Hinuon, may mga parokyano, nga Ash Wedneday pa lang, naningkamot nga makaadto’g kumpisalan.

Ug pag-abot didto, kinasingkasing nga naligo sa mga  luha sa paghinulsol sa ilang mga sala nga nabuhat.

Busa, dihang giisa sa pari ang lawas ug dugo ni Hesukristo ibabaw sa altar niadtong Pasko sa Pagkabanhaw, sila nabanhaw usab.

Ikaw, Bro. ug Sis, diin ka maligo sa miaging Semana Santa?