Pagbuntog sa linog

Samtang wa pay kahimanan sa Pilipinas ug bisan sa labing adunahan nga mga nasud nga makatino kanus-a mahitabo, asa moigo ug unsa ang gikusgon sa sunod nga linog, may bag-o nang mga teknolohiya unsaon pagpalig-on ang mga istruktura aron nga makalahutay sa kusog nga paglihok sa yuta.

Ang mahalong mga teknolohiya gipatuman sa Japan, Estados Unidos ug ubang dagkong kanasuran nga nahiagom sa mas kusog ug mas subsob nga mga linog.

Apan may mga teknolohiya sab nga mas barato ug busa mapatuman sa kabos nga mga nasud sama sa Pilipinas.

* * *

Labing kinaham sa mga enhinyero mao ang base isolation, o pagbuwag substructure (bahin nga nalubong sa yuta) sa building gikan sa superstructure (bahin nga makita ibabaw sa yuta) ginamit ang gisapaw-sapaw nga mga plaka nga pinutos og goma ug puthaw.

Kon matay-og ang yuta, molihok ang sukaranan sa way pagtandog sa ibabaw sa building.

Ang mga Hapones nipuno og sensors nga kon mo-uyog ang yuta mopalihok sa air compressor, nga mobuga dayon og hangin nga mo-alsa sa building baleg usa ka pulgada gikan sa sukaranan.

Human sa linog, mapawong ang compressor ug mobalik ang building pagtapot sa sukaranan.

* * *

Kon wa pa tay kuwarta pagsagop sa mahalong mga teknolohiya, niay baratong mga alternatibo:

Sa Peru, mas gipalig-on ang buildings pinaagi sa pagputos sa mga bungbong og baga nga plastik;

Sa India, gipalig-on ang mga semento pinaagi sa pagbutang og kawayan;

Sa Indonesia, gihimo ang bearings gikan sa ginamit nga mga ligid nga gisudlan og bas ug bato; ug

Sa New Zealand, gigamit ang cardboard ug kahoy nga mga haligi.

* * *

Nagpadayon sab ang pagtuon sa bag-ong mga materyal sa pagpalig-on sa mga istruktura. Nadani ang mga siyentipiko sa katalagsaon sa mga bay sa kaka: Gawas nga mas lig-on kay sa puthaw, makapahiuyon pa gyod sa masugatan nga puwersa.

Dihang ilang gibira ang usa ka lanot sa laway sa kaka, namatikdan sa researchers nga ang lanot nigahi, dayon niinat, dayon nigahi na sab.

Masaligon ang mga siyentipiko nga kon ilang makopya ang katakos sa bay sa kaka pagsugakod sa mga puwersa nga modasmag, makalahutay na ta bisan unsa kakusog, bisan di pa matag-an, ang mosunod nga mga linog.

* * *

[email protected]