Panaw sa atong kaugalingong Emmaus

Sa dihang nipanaw ang duha ka mga tinun-an human sa hitabo didto sa Jerusalem si Jesus mipakita kanila ug gani mikuyog kanila. Apan sa maong panagkuyog ang duha wala makaila kaniya.  Tingali kaha tungod kay malisud alang kanila ang pagdawat sa kamatuoran nga sila nahimong biktima sa mapintas nga kalibutan.

Namatay sa dugoong paagi ang ilang sinaligan nga si Jesus ang giila nilang Ginoo ug Magtutudlo. Nahalansang sila sa maong hitabo.

Ning paagiha nahimong malisud alang nila ang pagsud-ong sa kasamtangan kay nasakitan sila sa ilang kagahapon. Sa dihang gihimo ni Jesus ang pagpasabot ingon man ang pagpikas sa pan, nahigmata sila sa kamatuoran. Buhi diay ang ilang Ginoo ug Magtutudlo.

Kini maoy nakapadasig nila sa pagpauli sa ilang gigikanan aron itaho kining maong kasinatian. Sa atong kinabuhi, nahimong bug-at ang mga problema nga tungod niini, nahimong mas malisud alang nato ang pagsud-ong sa atong mga kaubanan ug sa kaanindot sa kalibutan.

Nakahatag kini kanato og kawalay gana ug naghimo kanato nga mga tawong nawad-an og pokus ug padulngan. Mao nga mahinungdanon kaayo sa atong panaw nga atong padilaabon ang siga sa pagtuo nga dunay nindot taliwala sa kangil-ad sa kalibutan ug mga kasinatian.

Mahinungdanon kaayo ang pag-angkla sa defining moment sa atong kinabuhi nga nakahatag kanato og sense of purpose. Ang atong kinabuhi nahimong mas makahuloganon kun tugotan lamang nato nga diha sa hinay nga panaw sa kinabuhi atong hagpat hagpaton ang mga kasinatian nga naghatag kanato og kadasig....ug human kita madasig mobalik kita sa mga sama nato nga nagkinahanglan og pagdasig.