EDITORYAL - Diyalogo gikinahanglan

Ang pagbutang og police checkpoints sa kadalanan dako kaayo og ikatabang sa seguridad sa publiko ilabi na sa mga motorista gikan niadtong mga dautang magsakyanan o magmotor. Gani  pinaagi sa police checkpoints daghan nang mga nangadakpang kriminal ug nakapamenus usab kini sa kakakulba sa mga tawo nga maglakaw diha sa kadalanan tungod kay dunay polis nga naa pirme makita ug masangpit.

Gawas pa niana, ang checkpoint karon nakatabang sab pagsanta sa pagsiaw nianang mga private armed groups nga posibleng gamiton sa mga politiko aron sila mamentaha sa ilang mga kontra o ba kaha paghadlok sa mga supporters sa ilang mga kaatbang.

Apan si Cebu City Mayor Tomas Osmeña ning bag-ohay lamang nireklamo batok sa checkpoint nga gibutang diha sa atubangan sa ilang balay ug giisip kini sa mayor nga pagpang-harass kaniya ug sa iyang mga supporters.

Di kini bag-ong pasangil sa mayor, kay makadaghan na siyang wala ganahi sa mga polis sugod paglingkod niini niadtong 2016. Karong panahon sa kampanya, daghan nang reklamo ang mayor batok sa mga polis nga balido sab unta ug angay nga sulbaron sa kadagkoan sa gobiyerno.  Apan kay panahon karon sa eleksyon, apil sa iyang gipasanginlan ang iyang kaatbang sa pagka-mayor nga si Bise Mayor Edgardo Labella nga nigamit sa mga polis sa politika, butang nga gihimakak sa naulahi.

Hangtud nga way mopatunga niining kasungian tali nilang Cebu City Police Office nga si Police Colonel Royima Garma dili kini mahunong. Si Garma gikan kaniadto sa Davao ug daghang nagtuong siya pinatuyo gyud pagbutang nganhi ni Pres. Duterte. 

May katungod si Osmeña moreklamo kun sa iyang tan-aw daw gihasi siya ug ang iyang mga supporters. Apan may katungod man sab ang mga polis pagbuot kun asa sila magbutang og checkpoint.

Tingali, alang sa kaayohan sa kadaghanan mas maayong ang duha ka kampo mag-diyalogo sa dili pa ang umaabot nga piniliay. Kanang diyalogo nga tinud-anay ang tumong dili lang “pakitang-tao.”