Negosyo sa pagtuo

Naandan na sa mga Katoliko nga adunay kaya ang paglaag-laag o paglulinghayaw panahon sa Semana Santa.

Samtang ang mga nagpraktis sa ilang pagka-Katoliko imong makita sa simbahan ug mga relihiyosong dapit nga naghimo sa mga gimbuhatong Katoliko sama sa Via Crucis, Bisita Iglesia ug uban pa.

Si Cebu Archbishop Jose Palma miawhag sa mga Katoliko sa pagpamalandong inay magbakasyon ning panahon sa Semana Santa. Seguro nakita sa arsobispo nga nagkadaghan na ang mga Katoliko nga mao nay giuna ang pagsuroy-suroy ug dili na pagpamalandong.

Ang Semana Santa ang usa sa mga panahon sa Pilipinas nga dagsaon sa mga lokal ug langyaw nga mga turista tungod kay molanat og pila ka adlaw niini ang walay trabaho ug init usab ang panahon nga maoy nakapaaghat sa uban sa pagpabugnaw ug pagtampisaw sa dagat ug ubang mga resort.

Tungod niini, mabuhi na usab ang negosyo sa mga dapit nga gidagsaan sa daghang mga bakasyonista. Bisan sa kilid sa mga simbahan buhi kaayo ang negosyo sa mga gagmay nga mga negosyante.

Awhag nako sa mga negosyante, ayaw lang pod ninyo palabii pamahal ang prisyo sa inyong mga baligya ug ang abang sa inyong mga kuwarto.

* * *

Gipirmahan na gayod ni Presidente Rodrigo Roa Duterte ang 2019 National Budget nga mokabat og 3.7 trilyones ka pesos apan wala apila sa pagpirma sa Presidente ang P95 bilyones nga gisingit sa mga kongresista tungod kay wala kini mahasubay sa Batakang Balaud.

Maayo gyod modala og lipat-lipat ning ubang mga kongresista. Una ilang gipasanginlan si kanhi Budget Secretary Benjamin Diokno nga maoy misingit og budget pero sila ra diay nga mga kongresista ang naghimo niini. Ambot lang!